Vanglaini - Thla ruk chhungin CWC-ah Case buaipui tur 496 a lut

KHAWTHLIR

AR hotupa leh CYMA inkawm

Assam Rifles 23 Sector DIG Brig. Vinod S chuan nimin khan an hmunah Central YMA hruaitute léngah sáwmin, Mizo ṭhalaite tana an hmalakna hrang hrang a hrilh. Brig. Vinod S chuan, sipai lâk leh turah Mizo ṭhalai tan pre-recruitment an buatsaih thu sawiin, chu'ngte chu puanzarsak turin a ngen. CYMA hruaitute chuan, Mizoram aṭanga Rihdil tlawh turte'n Zokhawthara Assam Rifles-te laka harsatna an tawh ṭhinte enfiah ni se an duh thu, Brig. Vinod S chu an hrilh ve bawk.

Bru Convention

Zanin aṭang hian Damparengpui, Mamit district-ah Home Mission North Bru Convention vawi 4-na neih a ni dawn a, Pathianni zanah a ṭiak ang. Inkhawmpuia thupui tur chu 'Ringtu nun' tih a ni a, speaker tur chu H Lalṭanpuia, Kraws Fate Team a ni ang.

Lusún khawhar

Thangrikhumi (83) w/o C Lalkhawliana, Chanmari, Aizawl chu nimin chhun dar 10:55 khan a thi a, vawiinah an chennaah vui a ni ang. Thangrikhumi hi chanchinbu lamah nasa taka inhmang ṭhin a ni a, a pasal C Lalkhawliana hi Mizorama prominent journalist mi tlemtê zinga mi niin, sap ṭawng chanchinbu Highlander editor leh publisher a ni.

PMMVY sawiho

Nimin khan Lawngtlai DC pisa conference hall-ah Lawngtlai additional DC B Lalchhawntluanga hoin District Level Steering & Monitoring Committee on Pradhan Mantri Matru Vandana Yojana (PMMVY) an ṭhukhawm a; Social Welfare department aiawh te, Chief Medical Officer aiawh, bank hrang hrang aiawhte leh common service centre neitute an tel. PMMVY hi nu leh nausen thihna tihtlemna tura hmalakna a ni a, August 2018 aṭanga kumin October thla thleng khan Lawngtlai district-ah mi 1,046-in PMMVY ṭanpuina an dawng tawh a, chuta tan chuan Rs. 41,45,000 pek a ni.

CEM-in hawng

Mizoram Football Association (MFA) leh Siaha District Football Association (SDFA)-te chuan nimin aṭang khan Siaha District khelmualah Inter-District Women's Football Tournament 2019 an buatsaih ṭan a, MADC chief executive member N Zakhai-a'n a hawng. CEM hian SDFA ṭanpui nan Rs. 20,000 a hlân nghal a ni.

DAWNTISEI

Thla ruk chhungin CWC-ah Case buaipui tur 496 a lut

Social Welfare department hnuaia Mizoram State Child Protection Society (MSCPS) chuan April- September 2019 chhung khan naupang kum 18 hnuai lam enkawl leh buaipui ngai case 496 an nei.

MSCPS hotute hnen aṭanga thu dawn danin, MSCPS hnuaiah hian Child Welfare Committee (CWC) a awm a; CWC hian kumin April-September chhung khan Mizoram pumah naupang enkawl leh venhim ngai case 457 an ziak lut a, chu'ng zinga 432 chu chinfel a ni.

CWC hian April-September thla chhunga case an ziah luh thar bakah hian, a hmain case buaipui lai 39 an nei a, April-September thla chhunga case kal mek leh ziah luh thar zawng zawng chu 496 a ni a, mipa 241 leh hmeichhia 255 an ni.

April-September, 2019 chhunga naupang case ziah luh thar 457 zinga 52 chu nu leh pa ruih theih thil ti an ni a, case 31 chu chhungkaw retheihna vang, case 29 chu nungchang ṭhat loh vang a ni. Ruihhlo (dendrite, correcting fluid, etc.) ti ṭhin case 20 leh mipat hmeichhiatna hmansual kaihhnawih (sexually abuse) vanga enkawl case 65 an nei a; chhan hrang hrang vanga an chhungte, NGO leh mi ṭhahnemngaite'n MSCPS hnena an dah an awm bawk.

MSCPS hnuaia awm tho, Juvenile Justice Board (JJB) chuan kumin April-September chhung khan case 99 an ziak lut a, a hmaa an khawih lai case 50 nen a vaiin case 149 an nei a, mipa 140 leh hmeichhia pakua an ni. Case 149 zinga 87 chu an chingfel tawh.

MSCPS programme manager Amy Lalrinpuii chuan, case tam chhan chu mipui, tlawmngai pawl, police leh thawktute thawhhona leh inrintawnna ṭhat tâwk vang a nih thu Vanglaini a hrilh a, "Mizote kan sual thar thut vang ni loin, mipuite'n hetiang lama naupang tana pan tur an hriat vang leh a thawktute an rin ngam vang a ni," a ti.

Amy Lalrinpuii chuan, state dang leh Mizoram chu khaikhin dan tâwk thiam a ṭul thu sawiin, "Reporting case a tam a, mahse, a tamna phênah hian sorkar hmalakna ṭhat vang te, media leh NGO-te kaltlanga awareness a ṭhat vangte a ni. Sikul hrang hrangah hetiang lama hma la tur nodal teacher-te kan dah tawh," a ti a; mipuiin naupang nun kawng dik zawhtir leh venhimna tur an ngaiven thiam tawh vang a nih bawk thu a sawi.

MSCPS hian naupang enkawltu mumal nei lo leh dan phal loh ti palhte'n nun kawng dik leh mumal zawk an zawh theih nan kawng hrang hrangin hma an la a, naupang emaw, nu leh pate emaw a ṭul anga counselling neihpuiin, home-a dah te, nau lâk (adopt) leh venhimna dante an buaipui a ni.

Share this Post

Login to comment

No Comments