Serchhip district-a Excise & Narcotics leh Police-te chuan nimin khan kumin May aṭanga October thla thlenga zu leh beer an mante chu Serchhip District Court-ah an tiral.

Zu tihral puala inkhawm tawi buatsaihah senior civil judge Ngursangzuali Sailo chuan, Mizoramah ruihhlo hmansualna a nasat thu sawiin, "Chhungkua, khawtlang leh ram min khawih buai a ni. Ruih theih thil vangin ṭhalaite an thi nasa a, HIV positive pawh ruih theih thil vang­in a hluar phah a ni. Ruih­hlote hi kan do chhunzawm zel a ngai," a ti.

Serchhipa Senior Civil Judge sawi danin, Excise & Narcotics leh Police-in heroin an mante chu tihral dân tura a duan anga tihral turin Drugs Disposal Committee-in an tihral turin an hnenah pek ṭhin a ni.

YMA Sub-Hqrs., Serchhip president RK Sanghmingthanga pawhin thu sawiin, ruihhlo do kawngah nasa lehzuala ṭan lak zel a ṭul thu a sawi a, "Tun ang renga kan ram a kal zel chuan kan ram hmabak chu a ngaihtuahawm hle dawn a ni," a ti.

Nimina zu leh beer tihralte chu - rakzu litre 460.6, BEDC litre 1,194, Diablo beer can 720, Dagon beer can 144, McDowell whisky ûm 1,008 a ni.

Share this Post