Bru pawl pathumin kawngpui dan an titàwp Ration tihtàwp vangin mi 5 thi tawh niin an sawi

Mizoram Bru Displaced Peoples' Forum (MBDPF), Mizo­ram Bru Indigenous Democratic Movement (MBIDM) leh Bru Tribal Development Society (BTDS)-te chuan thuchhuah inṭawm siamin, sorkar laipuiin Tripura-a Bru refugee camp-a awmte ei leh in tur a pek (free ration) a tihtawp hnuah ei tur neih loh vangin mi panga an thi tawh niin an tarlang. Hetih lai hian, pawl pathumte hian October 31, 2019 aṭanga kawngpui an dan chu November 5 tlai khan an titâwp.

Bru pawl pathumte chuan, sorkar laipuiin free ration a pek ṭhin, kumin October thla tìr lam aṭanga a tihtawp hnuah mi panga an thi tawh nia sawiin, "Mi panga zinga pahnih chu naupang an ni a, tun thlengin damdawi-inah mi 50 dah luh an ni tawh," an ti a; free ration an dawn ṭhin tihtawp a nih avangin ei tur an nei mumal lo a, mi tam takin ramhnuaiah ei tur zawngin an ei a, chuvang chuan pum lam ṭha lo, kawṭhalo, santèn leh tuihrite a tam niin an tarlang.

MBDPF, MBIDM leh BTDS-te hian October 31, 2019 aṭang khan tiam chin awm loin Kanchanpur-Ananda Bazar kawng chu Dasda-ah an dang a; kawng an dan chhan chu - free ration an dawn ṭhin pek chhunzawm leh Mizoram mi Bru-te Mizorama hruai kîr hna kal lai tihtawp an phût vang a ni.

Pawl pathumte tarlan danin, ni nga chhung kawngpui an dan hnuah November 4, Thawh-ṭanni khan Tripura additional chief secretary Kumar Alok kaihhruaiin Tripura sorkar hotute nen Kanchanpur-ah an inbia a; mahse, Bru hoin kawngpui an dan chhan tihhlawhtlinna turin thutlukna siam a awm lo.

Meeting-ah hian Tripura sorkar hotute chuan kawngpui dan chu November 4, tlai dar 3 hmaa titawp turin an nawr a, tihtawp a nih loh chuan sorkarin Bru pawl hruaitute leh kawngpui dannaa duty-te chungah action a lak tur thu an hriattir a ni.

Tripura sorkarin India sorkar, Prime Minister leh Home Minister-te thutlukna an thlak thei lo a, chuvang chuan free ration chu pek chhunzawm theih a nih loh thu leh Bru camp-te chu ṭhiah vek tura tih a nih thu te, November 5-7, 2019 chhunga Mizoram pantu Bru chhungkuate hnenah an dawn tura ruahman sa bakah, Rs. 2,500 zel pek belh an nih tur thu an hrilh bawk. 

Tripura sorkar dinna an hriat avangin North Tripura-a Joyshree police outpost bulah Bru mi ṭhenkhat - Lalhmangaiha (31) s/o Lalchhunga, Obiram (37) s/o Dormojoy, Hamsapara-a mite leh Dohoram (36) s/o Kobichondro, Kaskaopara te chu kut thlak an nih thu sawiin MBDPF, MBIDM leh BTDS-te chuan, "Tunah hian damdawi-inah an awm mek a ni," an ti.

Bru pawl pathumte chuan, ei leh in tur mumal neih loh vanga harsatna tâwk leh thi an pun zel avang leh, Tripura sorkara Kanchanpur Sub-Divisional Magistrate-in November 4, 2019 khan Cr.PC Section 144 hmangin punkhawm khapna thupek a chhuah avangin kawngpui an dan chu November 5, Thawhlehni chawhnu dar 2:30 vel khan an titawp ta tih an puang a ni.

Hetih lai hian, Bru pawl dang paruk - Bru Welfare Union India (BWUI), Bru Students' Association (BSA), Bru Society of India (BSI), Bru Christian Fellowship (BCF), Mizoram Bru Driver Association (MBDA) leh Bru Cultural Organisation (BCO)-te chuan nimin khan thuchhuah inṭawm an siam a; Bru refugee camp-a free ration pek ṭhin tihtawp a nih avangin mipuiin harsatna nasa tak an tawh mek sutkian a nih theih nan hma la turin thuneitute an ngen.

Bru pawl parukte chuan, Bru camp-a pawl pathumin kawngpui an dan chhan - ration pek chhunzawm phût chung­chang chu sorkar thuneitute'n an bengkhawn duh lo nia sawiin, "Ration buhfai a tawp avangin buaina punlun zawngin a kal palh thei a, chuvangin ration buhfai hi pek chhunzawm a nih theih nan leh buaina sutkian a nih theih nan a rang lama hma la turin thuneitute kan duh," an ti.

BWUI, BSA, BSI, BCF, MBDA leh BCO-te chuan, Bru refugee camp hrang hranga awm, ei tur nei lote mangangin Tripura, Mizoram leh Assam-a awm mek Bru-te hnenah an tana vehbúr khawnsak turin an ngen tih an sawi a; an ngenna angin, hmun ṭhenkhatah chuan vehbúr khawnin ei tur an thawn ṭan tawh thu leh Mizorama awm mek Bru-te pawhin vehbúr an khawn ṭan mek thu an tarlang bawk.




Share this Post

Login to comment
No Comments