CM hoin Khawzawl district thar lawm a ni

Khawzawl district thar chu nimin khan Khawzawl Field no. 1-ah lawm a ni a, chief minister Zoramthanga khuallian niin, deputy chief minister leh bialtu MLA Tawnluia khualzahawm a ni. Chief Minister chuan, district thar pathumah tihpuitlin ngaite tihlawhtling tura hmalak zel a nih thu a sawi.

CM Zoramthanga chuan, Khawzawl district mipuite duhsakna hlanin, "Sorkarin a tum angin district function tírin, kawng chi hrang hrangin hmalakna chhawp chhoh zel a ni a, tihpuitlin ngaite tipuitling tura bawhzui zel a ni," a ti.

Khawzawl leh district thar dang pahnihah sorkar in hrang hrang leh thawktute tihfel chhoh mek a nih thu sawiin, "Hmabak dang la awm zawng zawng pawh theihtawp chhuaha tihfel a ni ang," a ti a; Mizoram khawchhak lamin kawng ṭha an mamawhna a hriatpui thu sawiin, kawng ṭha a awm theih nan sorkarin theihtawpin hma a lak thu a sawi.

Chief Minister chuan, Pathianin malsawmna a pekte chu hman ṭangkai thiam a ṭul thu sawiin, "Leilung ṭha, a chhunga chêngte châwm zo ram zau tak, boruak thianghlim, sik leh sa nuam tak ram kan neih hi kan hman ṭangkai theih chuan ei leh inah intodelhna a thlen bakah, chhung tin sum lak luh a pun phah dawn a ni," a ti.

Deputy CM Tawnluia chuan, Khawzawl district-in hlawhtlinna a hmu ta chu a lawmpui thu sawiin, sorkara minister leh department hrang hrang hotute chungah lawmthu a sawi a; district nihnaah duh tâwk mai lo a, district ṭhang duang tak leh district dangte tana entawn tlak a nih theih nan khawtlang hruaitute leh mipuite chu thawhpuiah a sáwm.

Inkhawmah hian Assembly speaker Lalrinliana Sailo leh minister C Lalrinsanga te pawhin thu an sawi a; minister dang Lalruatkima leh Dr K Beichhua te, MLA pali - Dr ZR Thiamsanga, Zothantluanga, L Thangmawia leh C Lalmuanpuia te an tel bawk.

Khawzawl district thar lawmna inkhawm hi Khawzawl District Celebration Committee chairman K Lalzika'n a kaihruai a; Khawzawl district tihpuitlin a nih theihna tura theihtawp chhuahtu mi pasarihte chawimawina hlan a ni.



Share this Post

Login to comment
No Comments