Nimin khan Pa­chhunga University College (PUC) Seminar Hall-ah ni thum awh tur, 'International Con­ference on Recent Advances in Animal Sciences (ICRAAS) 2019' ṭan a ni a, Higher & Technical Education (HTE) minister Dr R Lalthangliana'n a hawng.

HTE Minister chuan, animal science hnuaia hmasawnna hrang hrang­te zirho a ni tur chu thil ṭangkai tak a nih ngei a beisei thu sawiin, "Mizo­­ram hi nungcha chi hrang hrang nei ṭha ṭhin kan ni a, tun hnaiah nungchate an tlem tial tial a, a veiawm em em a ni," a ti a; conference chuan nungchate humhalh leh sik leh sa venhim kawngah rah ṭha a chhuah a beisei thu a sawi.

ICRAAS 2019 hi PUC Department of  Zoology-in PUC diamond jubilee hriat­rengna atana an buatsaih a ni a, Mizoram sorkara Fisheries department, Agriculture (RD department), Environment, Forest & Climate Change department, Mizoram University, Mizo Academy of Sciences leh Mizoram Business Centre-te thawhpuiin, nimina a hawnnaah MZU registrar Dr Lalnundanga khualzahawm a ni.

ICRAAS chhunga zirho turin research paper 132 thlan a ni a, vawiin leh naktukah chhunzawm a ni ang. India ram state 20-a acade­mic leh research institution 30 bakah, Germany aṭangin resource person an tel a; mi 160 inziak lutin, scientist leh faculty 62, research scholar 57 leh zirlai 38 an tel bawk.

ICRAAS 2019 hi sorkar laipuia Science & Engineering Research Board, Department of Biotechnology leh North Eastern Council-te bultuma buatsaih a ni.

Share this Post