Vairengte-ah Covid-19 vei mi 27 hmu chhuak tawh

Mizoram sorkar thutlukna angin August 10, 2020 tlai aṭangin Vairengte checkgate-ah Assam aṭanga Mizorama lut tur zawng zawng Rapid Antigen Test hmangin endik ṭan a ni a, nimin tlai dar 5 thleng khan Covid-19 hripui vei mi 27 hmuh chhuah a ni tawh a, an zinga mi 26 chu truck driver leh handyman, hnam dang an ni.

Vairengte checkgate-ah hian August 12 khan zan lam thlengin Covid-19 vei mipa paruk hmuh chhuah a ni a, nimin chhun khan mi pasarih hmuh chhuah leh a ni bawk a; an vaiin truck driver leh handyman an ni.

Endik ṭan ni, August 10-ah Covid-19 vei mi pathum hmuh chhuah a ni a, hnam dang driver/handyman pahnih leh Mizo pakhat (Excise & Narcotics duty) an ni. August 11-ah driver/handyman vek mi 10 hmuh chhuah a lo ni tawh bawk. Hripui vei hmuh tawh zingah taksaa harsatna nei (Covid-19 symptom lang) an la awm lo.

Vairengte checkgate-ah hian nimin tlai dar 5 thleng khan Assam aṭanga Mizorama lût tur mi 960 endik a ni tawh a, chu'ng zinga mi 768 chu hnam dang niin, mi 192 chu Mizo an ni thung. Nimin zing dar 5 aṭanga tlai dar 5 inkar bikah Mizo 28 leh hnam dang 204, an vaiin mi 232 endik an ni.