Kan rama hmasawnna a kal theih loh chhan chu corruption a ni - ZPM President

ZPM president Lalliansawta chuan, Mizorama hmasawnna a kal hleih theih loh chhan ber chu eirukna leh hlemhletna (corruption) a nih thu leh, sorkar kalphung dik tâwk lote mipui hnena hriattir chu eptu party-te tih tur a nih thu a sawi.

Lalliansawta hian nimin khan Dulte khuaa street campaign-ah thu sawiin, "Kan rama hmasawnna a kal hleih theih loh chhan ber chu corruption a ni a, hei hian Mizote moral a ei chhe nasa em em. Mizoram budget hi mipui ta a ni a, party bil ta emaw, mi mal tute emaw pum puarna tur bik atana ruahman a ni lo, kan zavai atan rualkhai taka hma kan sawn theihna atana ruahman a ni," a ti.

ZPM President chuan, "Cam­paign-naah thu kan sawiin party dang leh sorkar lai mek thil tih dan leh kalphung sawi lan loh theih loh cháng a tam hle a, chu chu ṭhenkhatin mi dang sawichhia angte'n min sawi ṭhin. Sorkar kal­phung dik tâwk lote mipui hnena hriattir hi opossition party-te tih tur a ni tlat," a ti a; sorkarna chelhtu party-te thil tih dan dik lo leh ṭha lo sawi chhuah a ṭùl ṭhin thu a sawi.

Pathianin Mizote chu sik leh sa nuam tak leh leilung ṭha tak a pe tih sawiin Lalliansawta chuan, "A chhunga chengte'n natna chi hrang hrang leh chanchin duhawm lo tak tak kan nei tlat mai hi chhan lian tak a awm ngei niin a lang. Kan chungah Lalpa a lawm theih nan a duh zawnga ram rorelna kan kalpui a ngai. Ram hruaitute'n Pathian thu an awih a, an chungah Lalpa a lawm a ngai a ni," a ti.

ZPM President chuan, ZPM thli a tleh mek nia sawiin, "Party dang hian manifesto mumal an nei lo emaw tih mai turin ZPM beih ringawt mai an hnapui a ni ber a, ZPM chu hma lam panin Pathianin min hruai zel. Zoram mipui beidawngte tan beiseina thar siamsak turin theihtawp kan chhuah a, ZPM-ah hian Zoram mipui zawng zawng tel zel turin ka sáwm a ni," a ti a; kum 2018 inthlanah aiin tunah hian mipuiin ZPM-ah rinna an nghat tawh zawk niin a sawi.

Inkhawmah hian Lengteng biala ZPM candidate tur F Rodingliana pawhin thu a sawi a ni.