Furniture siamtu company IKEA Mizoramah an rawn lut dawn

Mizoram sorkar chuan thuchhuah siam-in, khawvela home furnishing company lar leh lian ber zinga mi, IKEA chu Mizoram rua leh mau suma chantir turin Mizoramah an rawn lut dawn niin a tarlang.

Sorkar thuchhuah tarlan danin, IKEA hian tun hnaiah rua leh mau aṭanga bungraw siam sa lei tihpun an tum a; an tih dan ṭhin, an ram luh tharnaa industry lian din ang chi chu ti tawh loin, an duh ang siam thei tur nena thawhho an duh a ni. Mizorama mau leh rua sawngbawlna kam khawih industry-te thawhpui atan an duh a; thawhpui zawng tur hian Chief Minister-in IKEA hotute a sáwm a ni.

IKEA project head Rajasekhar Warrier chu Aizawlah a lo kal dawn a, Febuary 11, 2016 hian Mizoram sorkarin work-shop a buatsaihsak ang. Workshop-ah hian changél, rua leh mau industry din duhte nen an thawhho dan tur te, an thawhpuite hnen aṭanga IKEA beisei/phût te, bank dawrna turte leh an siam chhuah leisakna tura buy back agreement an siam dan turte zirho a ni ang.

IKEA hian Mizorama an partner-te hnen aṭang-in an thil siam chhuah mamawh tur, an duh zatte leh a rate-te hre sa vekin an leisak thei dawn a ni.