Chanmari-Chaltlang & Bawngkawn-Durtlang Kawngpui kam khâma in sakte enfiah

UD&PA department, Aizawl Municipal Corporation (AMC) hotute leh INTACH, Mizoram Chapter hotute chuan nimin zing khan Chanmari-Chaltlang leh Bawngkawn-Durtlang Leitan inkar kawngpui kama in sakte an enfiah. In sak tawhte'n dan an zawm leh zawm loh endik an rel.

Chanmari-Chaltlang leh Bawngkawn-Durtlang inkar kawngpui leh a kama in sakte en-fiahnaah hian UD&PA secretary Dr C Vanlalramsanga, joint secretary Vanlalmawia, director Zorammuana leh hotu dangte an kal a; AMC aṭangin commissioner Dr H Lalthlangliana leh hotu dangte a tel a, INTACH aṭangin convener P Rohmingthanga a tel.

Kham kára insak enhonaah hian AMC hotute chuan, in sak tawh chu tihngaihna vak a awm lo a, ṭhiahtir a harsa tawh hle niin an sawi. UD&PA hotute erawh chuan, in sak tawh tihngaihna a awm lo tih zel dawn chuan a buaithlak tur thu leh dan loa in sate chu
ṭhiahsak theih an ni a, ṭhiahsak a nih pawhin, a ṭhiah man chu in neitu tum tur a nih thu an sawi.

UD&PA hotute chuan, Ai-zawl Master Plan chu sorkarin a pawm tawh avangin dan anga hman theih a nih thu sawiin, "Tun aṭang chuan AMC-in Building Regulation a nihna ang takin kalpui tawh se. Master Plan hi a nihna anga an hmang a nih chuan law court-ah hlauh tur a awm lo," an ti.

Kawngpui kama khâm kara in sakte enfiahnaah hian hmalak zel dan tur an sawiho nghal a; tuna khâm tak taka in sak tawhte chu AMC lamin an endik zui ang a, insak phalna pek an nih dante enfiah zui se, in sak danah dan an zawm em tihte enfiah se, an ti.

Hmalak zui dan tur an rel dan chuan, in sak phalna pek tawhte chu architechtural design anga sak a nih leh nih loh AMC-in an endik ang a, design ang loa in sak a awm chuan, architechtural design siamtu licence cancel sak thlenga hmalak an rel a; dan loa sa leh in him lo zualte chu ṭhiahsak thlenga hmalak an rel a ni.

Local council-te'n an huam chhungah ram hralh leh lei leh in sakte uluk taka enpui tur-in an chah a, danin a phal lohna hmuna mite chu lo dang/hnawl turin an ngen. Building Regulations-a Chanmari-Chaltlang leh Bawng-kawn-Leitan inkara in sak phal-sak dan chungchangah, kawng
aṭanga ft. 20-a hlaah sak tur a nih thu an sawi.

UD&PA hotute chuan, phal lohna hmuna in sa leh dan kalha in sate chungchangah, INTACH Mizoram Chapter emaw, NGO dangte emaw Court-a PIL thehlut tura ngen ṭha an tih thu an sawi bawk.