Vanglaini - Leiṭha hman dan inzirtir

KHAWTHLIR

Kawng siam en

Minister of state Lalruatkima chuan nimin zing khan a bial chhung, Aizawl Tennis Court thlanga kawng péng-ṭhuam siamṭhat mek a hmunah a enfiah a; UDPA leh PWD hotute'n ṭawiawmin, siamṭhat ngai leh hmalakna turte an sawiho. Kawng siamṭhat hi metre 40 vela thui, metre 7 vela zau a ni.

Volleyball-a Inelna hawng

Mizoram Volleyball Association-in Mizoram pum huapa khua/veng hrang hrangte inelna tur Inter Village Volleyball Tournament an buatsaih tur chu October 21, Thawhṭanni zan khan minister R Lalzirliana'n Chanmari YMA Hall-ah a hawng. Volleyball tournament-ah hian mipaah team 52 leh hmeichhiaah team 18 an tel dawn a ni.

Thisen pe

Pachhunga University College NSS Unit chuan nimin khan an college seminar hall-ah blood donation camp an huaihawt a, Aizawl Civil Hospital tan thisen unit 88 an pe a, a petute mipa 70 leh hmeichhia 18 an ni. Nimin vek khan Saiha College NSS leh Red Ribbon Club ten an college-ah Siaha District Hospital tan thisen unit 34 an pe bawk. T Romana College NSS unit chuan Thawhṭanni khan Aizawl Civil Hospital tan thisen unit 229 an pe a, petute mipa 149 leh hmeichhia 80 an ni.

Chite lui tifai

Aizawl West College IQAC hnuaia Research Project & Documentation Cell leh Youth Adventure Club (YAC)-te hmalaknain zirlai leh zirtirtute'n Save Chite Lui Coordination Committee nen ṭanghoin nimin khan Chite lui, Bethlehem Vengthlang kai thenfai hnatlang an huaihawt a; mi 68 thawk chhuakin, Chite luia bawlhhlawhte an thianfai a ni.

Hna chan thlak

Mizoram sorkar chuan MCS officer, Mizoram sorkara secretary post chelh ṭhenkhatte department chan a tidanglam. Lalzirmawia Chhangte chu Sports & Youth Services department chang tura tih a ni a, Thlamuana chu Art & Culture department chang tura tih a ni.

DAWNTISEI

Leiṭha hman dan inzirtir

India hnampa Mahatma Gandhi pian champha vawi 150-na lawmna kal zelah Mamit district Krishi Vigyan Kendra (KVK), Lengpui chuan nimin khan Lengpui community hall-ah leiṭha hman dan dik inzirtirna, 'Awareness programme on correct use of fertilizers & manures' an buatsaih.

Inkhawm hi KVK Lengpui senior scientist Dr Vanlalhruaia Hnamte-in a kaihruai a, scientist (Agroforestry) Dr Rebecca Lalmuanpuii'n leiṭha hman dan dik leh leilung endik (soil testing) chungchang a zirtir. He hunah hian Lengpui V/C president Lallawmthanga khuallian a ni.

Nimin vek khan KVK, Siaha chuan Zyhno khuaah leiṭha hman dan dik zirna an buatsaih bawk a, Siaha KVK scientist (Plant Protection) C Rachael-i'n kaihruaiin, divisional horticulture officer Vansanga'n a hmanpui.

Share this Post

Login to comment

No Comments