MJA-te'n Chitray Tea Garden an tlawh

Mizoram Journalists' Association (MJA) Kolasib District member-te chuan October 21, Thawhṭanni khan Darjeeling, West Bengal-a organic hmanga enkawl Chitray Tea Garden an tlawh.

Sorkar laipuiin organic farming a ngai pawimawh a, India hmarchhak bialah uar zawka kalpui turin a ruahman a ni. Mizoramah pawh chak taka kalpui tum a ni a, chuta tan chuan Mizoram Organic Mission (MOM) pawh din a ni. MOM hian agriculture sector-te tan organic farming kalpuina turin Kolasib district chu pilot project district atan a thlang. Chuvang chuan, Horticulture department chuan Kolasib MJA member-te chu Darjeeling leh Sikkim-a organic farming an kalpui dan zir turin an kaltir a ni.

Kolasib MJA member-te hian Thawhṭanni tlai khan Sikkim khawpui Gangtok an thleng a, nimin khan Gangtok leh a chhehvela Horticulture department-in organic farming an kalpuina hmun hrang hrang leh organic market-te an tlawh a ni.

MJA member-te chuan Thawhṭanni vek khan Darjeeling-a Salvation Army-in an enkawl bengngawngte lehkha zirna sikul, Home & School for the Deaf an tlawh a, an pawisa thawh khawm Rs. 2,000- an hlân. He Home & School hi kum 1972-a Kalimpong-a din ṭan, kum 1980-ah Darjeeling-a sawn a ni a, tunah hian commanding officer Capt. Lalbiakzauva te nupain an enkawl mek a ni.



Share this Post

Login to comment
No Comments