MJA-te COTPA zirtir

National Tobacco Control Programme (NTCP) chuan nimin khan Aizawl Press Club-ah Mizoram Journalist Association (MJA) mem­ber-te pualin vaihlo khapna dan, Cigarettes and Other Tobacco Products Act (COTPA) leh a kaihhnawih dan dangte zirhona an buatsaih a; IPR secretary Sangdingliana leh MJA president Zonunsanga Khiangte ten an hmanpui.

Zirhona hi National Health Mission (NHM) mission director Dr Eric Zomawia'n a kaihruai a, NTCP state nodal officer Dr Zorammawia'n NTCP hmalaknate a sawifiah. NHM legal consultant Vanlalzari'n vaihlo khuah­khirhna dante a sawi­fiah a, IPRO Andrew Lal­rem­ruata'n vaihlo khap chung­changa media-te hriat tur pawimawhte a sawi thung.

Sangdingliana chuan, kum 30 chhung vaihlo leh a kaihhnawihte do beihpui thlak a ni tawh tih sawiin, "Kum 1985 khan Mizoramah vaihlo zûk leh hmuam do bul ṭan a nia, bul ṭan tirhah zûk leh hmuam ti mi 85% an nih laiin, zirchianna thar berah chuan 58%-ah a tlahniam tawh. A ṭha zawngin 27%-in hma kan sawn a ni," a ti.

MJA president Zonun­sanga Khiangte chuan, ''Mizoramah vaihlo zûk leh hmuam do hmalakna kalpui a nih aṭangin MJA chuan phûr takin kan ṭawiawm reng a, kan member zingah pawh zûk leh hmuam ti an tlem tial tial a ni," a ti a; Aizawl Press Club chhungah hun rei tak aṭang tawhin meizûk lohna - smoke free zone-ah puan a ni tawh tih a sawi.

Zoram Medical College regis­trar Dr Jane R Ralte chuan, Global Adult Tobacco Survey (GATS)-1 (kum 2009-2010)-ah Mizoram chu India rama vaihlo zuk leh hmuam ti tamna ber (67.2%) state a nih laiin, NTCP hmalakna avangin GATS-2 (kum 2016-2017)-ah chuan pahnihna (58.7%) a nih tawh thu a sawi a, "Tunah chuan Tripura chu vaihlo ti tamna ber (65%) a ni," a ti.

NTCP Mizoram hotute sawi danin, Mizoramah tobacco free school 34 a awm tawh. COTPA-in a khapna hmuna vaihlo leh a kaihhnawiha dan bawhchhia mante hnena sum chawitir ṭhin 50% chu Mizoram sorkar sum báwmah a lut a, 50% dang chu vaihlo dona atan hman ṭhin a ni. Dan bawhchhia an man zinga Tobacco Cessetion Clinic-a councelling neihpui tura kalte chu an sum chawi tur 50% pek lêt leh ṭhin a ni bawk.




Share this Post

Login to comment
No Comments