Mizo National Front (MNF) chuan nimin khan hmun hrang hrangah MNF din champha vawi 58-na an lawm. MNF president Zoramthanga chuan, Pathian ṭanpuinain arsi (MNF symbol) a êng zual zel dawn niin a sawi.
Mizo Hnam Rûn, Aizawla MNF din champha lawmnaah Zoramthanga chuan, Pathianin MNF a kaihhruai nasat dan chu a mak a, lawmawm a tih thu sawiin, "Party ṭhenkhatin vawi 8/9 emaw lai an party hming an thlak tawh laiin, MNF chuan hming dang a la pu ve lo a, MNF founder president Pu Laldenga sawi angin, ‘MNF chu MNF a ni mai’ tih hi MNF nihna dik tak a ni. Pathian ṭanpuinain arsi a êng zual zel dawn," a ti.
Zoramthanga chuan, Congress party chu phai lamah leh Mizoramah an chhe deuh vek tawh nia sawiin, "President tur pawh an inhmu zo tawh lo a, Search Committee hial an indin a, an tihngaihna hre loin Sonia Gandhi bawk an hnawn leh a ni," a ti a; central leh state hrang hrangah Congress dinhmun a hniam zel niin a sawi.
Mizoram Congress pawh phai lama Congress tihnun chawp an nia sawiin Zorama chuan, "A tinungtu lam engmah an ni tawh si lo a, thingtlang lamah nen lam an hniam ta hle. An chhiatna turin Pathianin Congress party Mizoramah a chawi sáng a, tute nge an nih chiah tih mipuiin kan hriat theih nan thuneihna an kutah dah a ni a, zu zuarin an chêtna hrang hrangah leh he ram enkawlna kawngah neitu nihna thinlung an pu lo tih a chiang hle," a ti.
MNF President chuan, Lengpui Airport chu India Air Force hnena pe turin Congress sorkarin thutlukna an siam hman nia sawiin, "Keini chuan kan thlawhna ṭumhmun neihchhun hi mi dang kuta pek kan remti lo. India ram khawpui pahniha kan house-te PPP mode-a vai nen inṭâwm turin an lo ti a, kan chhuh zar zar a ni. Hriat chian poh leh Congress thil tih pawi a tam," a ti a; Congress sorkar kih hnawk an thian zel niin a sawi.
ZPM chungchang sawiin Zoramthanga chuan, inthlan dawnah an inzuar thiam a, MLA bial pariat an nei tih a sawi a, "Tunah an rawng dik tak lang chhuakin party-ah an inlet. ZPM MLA-te kha ‘ZPM-ah i tel em,’ ti ila ‘Ka tel’ an ti ngam tawh lo. ZPM MLA-te buaina hi MNF-in kan tih a ni lo a, Congress tih a ni hek lo. Anmahni buaina insiam chawp liau liau a ni," a ti.
Zoramthanga chuan, SEDP an kalpui ṭan nia sawiin, "SEDP hi hriselna lam hawiin hmalakna hmasa kan ṭan a, SEDP Health Care duan niin chhungkaw tinin kum khatah nuai hnih chin an bill thei dawn. Tunah hian economic programme kan la ṭan lo deuh a, Delhi lam an phûr ṭan a, a lawmawm hle," a ti a; chaw, ei leh bar leh sa-ah intodelh tumin theihtawp an chhuah dawn tih a sawi.
MNF din champha vawi 58-na lawm nan hian Sangau MNF Joint Unit Committee chuan Sangau damdawi-ina poor fund-ah Rs. 7,500 an hlan a ni. Lungleia Mizo Hnam Runah lawm a ni bawk.
MNF din champha lawmna inkhawm hi vice president R Tlanghmingthanga'n a kaihruai a, martar-te hriatrengna leh sûn nan ngawi rengin minute khat chhung an ding a ni.
Login to comment
No Comments