Mizoram Secondary School Games ṭan a ni

Mizoram Secondary School Games vawi 37-na chu nimin khan Kolasib Sports Stadium-ah ṭan a ni a, School Education minister Lal­chhan­dama Ralte-in a hawng.

Lalchhandama Ralte chuan, Kolasib district-a Mizoram HS Games nghah a ni chu lawmawm a tih thu sawiin, Aizawl páwn lama nghah a ni chunga Mizoram HS Games neih tawha zirlai infiam tura an tel tam ber ṭum a ni chu chhinchhiah tlak a nih thu a sawi a; Games chu inṭhian ṭhatna, inunauna leh inpumkhatna thlentu, zirlaite tan hmasawnna rahbi thar thlentu ni turin duhsakna a hlan.

Minister chuan, zirna leh infiamna chu thil inkawp tlat, ṭhen hran hleih theih loh a ni tih sawiin, "Sport hi taksa insawizawina piah lamah, rilru thlenga sâwizawina hmanrua a ni a, rilru leh taksa hriselna thlentu, eizawnna atan pawh hman tlak a nih avangin sorkarin sport lamah nasa takin hma a la a, 

ṭha­laite talent phochhuah nan sorkarin hma a la zel dawn a ni," a ti.

Mizoram Secondary School Games hi Aizawlah ṭum 35 nghah a nih hnuah nikum khan Thenzawl leh Champhaiah nghah a ni a, kuminah pawh Aizawl pawnah nghah leh a ni.

Kuminah hian district hrang hrang aṭangin zirlai infiammi 706 an tel a; athletics, boxing, football, hockey (girls), judo, volleyball (boys and girls)-ahte an inel dawn. Ocotber 25, 2019-ah khâr a ni ang.



Share this Post

Login to comment
No Comments