Vanglaini - ZPM hminga thlan tlin MLA-te'n Legislature party hming an thlâk dawn

KHAWTHLIR

Kawng siam en

Minister of state Lalruatkima chuan nimin zing khan a bial chhung, Aizawl Tennis Court thlanga kawng péng-ṭhuam siamṭhat mek a hmunah a enfiah a; UDPA leh PWD hotute'n ṭawiawmin, siamṭhat ngai leh hmalakna turte an sawiho. Kawng siamṭhat hi metre 40 vela thui, metre 7 vela zau a ni.

Volleyball-a Inelna hawng

Mizoram Volleyball Association-in Mizoram pum huapa khua/veng hrang hrangte inelna tur Inter Village Volleyball Tournament an buatsaih tur chu October 21, Thawhṭanni zan khan minister R Lalzirliana'n Chanmari YMA Hall-ah a hawng. Volleyball tournament-ah hian mipaah team 52 leh hmeichhiaah team 18 an tel dawn a ni.

Thisen pe

Pachhunga University College NSS Unit chuan nimin khan an college seminar hall-ah blood donation camp an huaihawt a, Aizawl Civil Hospital tan thisen unit 88 an pe a, a petute mipa 70 leh hmeichhia 18 an ni. Nimin vek khan Saiha College NSS leh Red Ribbon Club ten an college-ah Siaha District Hospital tan thisen unit 34 an pe bawk. T Romana College NSS unit chuan Thawhṭanni khan Aizawl Civil Hospital tan thisen unit 229 an pe a, petute mipa 149 leh hmeichhia 80 an ni.

Chite lui tifai

Aizawl West College IQAC hnuaia Research Project & Documentation Cell leh Youth Adventure Club (YAC)-te hmalaknain zirlai leh zirtirtute'n Save Chite Lui Coordination Committee nen ṭanghoin nimin khan Chite lui, Bethlehem Vengthlang kai thenfai hnatlang an huaihawt a; mi 68 thawk chhuakin, Chite luia bawlhhlawhte an thianfai a ni.

Hna chan thlak

Mizoram sorkar chuan MCS officer, Mizoram sorkara secretary post chelh ṭhenkhatte department chan a tidanglam. Lalzirmawia Chhangte chu Sports & Youth Services department chang tura tih a ni a, Thlamuana chu Art & Culture department chang tura tih a ni.

DAWNTISEI

ZPM hminga thlan tlin MLA-te'n Legislature party hming an thlâk dawn

Kum 2018 Mizoram inthlanpuia Zoram Peoples' Movement (ZPM) candidate thlan tlinte chuan Assembly House-ah ZPM ni lo hming dang invuahin legislature party an din dawn. Assembly speaker Lalrinliana Sailo pawhin hming dang an invuah a nih chuan legislature party anga hlâwm khata an awm a rem lohna tur a awm loh thu a sawi.

Zoram Peoples' Movement MLA an nih anga ZPM Legislature Party (ZLP) an nih laia an secretary Dr Vanlalthlana chuan Vanglaini zawhna chhangin, dan angin ZPM aṭanga thlan tlin MLA-te chu an awm khawm a rem lohna tur an hriat loh thu a sawi a, "Legislature party pakhat siam turin hming dang invuah turin ruahmanna kan siam a, kan hming tur erawh kan la thlang fel chiah lo," a ti.

Dr Vanlalthlana sawi danin, an legislature party hming tur an la tihchian loh rualin, ZLP hming an put chhunzawm theih nan 'Zo' tih hman a, Zo Peoples' Movement tih invuah rawtna a awm. Chutih rualin, an hming tur chungchangah hian ziakin Speaker hnenah an la thlen lo thung.

Dr Vanlalthlana chuan, Zoram Peoples' Movement hming an put Assembly Speaker-in a phal tawh loh chhan ziaka hriattir an ni lo tih a sawi a; chutiang bawkin, hming dang invuaha legislature party din a rem chungchangah pawh ziaka inhriattirna a awm loh thu a sawi bawk.

Assembly speaker Lalrinliana Sailo pawhin Vanglaini palai zawhna chhangin, ZPM aṭanga thlan tlin MLA-te chu an duh phawt chuan inhlâwm khawmin, legislature party an din danin a phal thu a sawi a, "Dan angin legislature party an din a thiang a, mahse, Zoram Peoples' Movement erawh chu political party a nih tawh avangin an hman zui a rem lo. Registered political party hming ni lo an invuah erawh chu a rem reng a ni," a ti.

Lalrinliana Sailo chuan, ZPM aṭanga thlan tlin MLA-te'n legislature party an din chungchang chu Assembly officer-te nen pawh an sawiho tawh thu sawiin, "Hming dang invuaha legislature party an din hi a rem lohna tur a awmin kan hre lo, danin a phalsak a ni," a ti a; inthlan laiin thukhat vuain, policy thuhmun neia inthlan hmachhawn leh thlan tlin an ni tih an hriat thu a sawi.

Share this Post

Login to comment

No Comments