Health Minister-in Thingsai PHC a hawng

Thingsai damdawi-in (primary health centre) sak thar chu October 19, Inrinni khan Health and Family Welfare minister Dr R Lalthangliana'n a hawng.

Damdawi-in hawnna inkhawm hi Health principal director Dr F Lallianhlira'n a kai­hruai a; Health Minister chuan, Thingsai PHC chu Hnahthial district tharin a ken tel nia sawiin, Thingsai leh a chhehvel mipuite'n ṭangkai taka an hman a duhsak thu a sawi a, "Bul kan ṭan tawh a, ṭha takin a tàwp kan thleng tur a ni," a ti.

Dr R Lalthangliana chuan, Hnahthial district tihmasawn zel tura pawimawh - inkalpawhna kawng, zirna-in thuam ṭhat leh higher secondary school-te sorkara hlânkai te, damdawi-in leh health sub-centre-te mamawh bungrua leh thawktu dah belh te, sorkar pisa leh quarter-te, mipui mamawh em em Bank branch hawn kawngah te hmalak mek zel anih thu kalkhawmte a hrilh a ni.

Thingsai PHC building thar hi cheng nuai 108.97 sénga sak a ni a; RCC building niin, square metre 469.53-a zau a ni. Damdawi-in enkawl tur hian medical officer Dr Betty Laldin­tluangi, nurse pathum leh fourth grade pahnih an thawk mek a ni.



Share this Post

Login to comment
No Comments