Kolasib-ah vaihlo beihpui thlakna hawng

Naupang hnena vaihlo zûk leh hmuam ṭhat lohzia zirtirna leh a laka an fihlîm theihna tura beihpui thlakna chu nimin khan Kolasib DC Zoengsanga’n Kolasib Diakkawn YMA Hall-ah a hawng.

Zoengsanga chuan, vaihlo zûk leh hmuam chu mihring taksa tan mai bakah, rilru thlenga nghawng theitu a nih avangin tih loh a him ber tih sawiin, "Lehkha zirlai tan phei chuan rilru chak lohna thlentu a nih avangin a laka fihlîm turin zirlaite an fihlim a ngai. Pathianin mihring taksa hi thianghlim taka vawng turin a duang a ni," a ti.

National Tobacco Control prog­ramme (NTCP) district consultant ZT Vawra Hmar chuan, upper primary school hrang hrangah vaihlo zûk leh hmuam ṭhat lohzia zirtirna kalpui a nih tur thu te, khawtlang hruaitu, health worker leh zirtirtute tan pawh training buatsaih a nih tur thu leh, Vairengte leh Kawnpuiahte pawh beihpui thlak a nih tur thu a sawi.

Inkhawmah hian NTCP district nodal officer Dr C Vanlalhlimpuia'n vaihlo zûk leh hmuam laka beihpui thlak pawimawhzia leh vaihloin mihring hriselna a nghawng dante a sawifiah a ni.



Share this Post

Login to comment
No Comments