Sikul ṭan hun hma lutuk hi!
Kan sorkarin sikul kal hun siam danglam a, zing dar riata ṭan vek tura a ti hi engemaw chenah chuan a ṭha pawh a ni thei e. Kan working culture kan thlakna ṭha tak pawh a ni maithei.
Thingtlang hmun tam takah chuan zing dar riatahte hi chuan, nipui lai ngat chuan kuthnathawk mite chu fehin an chhuak daih tawh ṭhin a, kan working culture-ah chuan kori a tu thui vak chuang chuan a rinawm lo.
Thingtlang khaw tam takah chuan hna-thawk turte hi tukṭhuan ei khamah an chhuak a, thleng seng leh silfai vel chu sikul naupang, sikul kai turin an tum tlangpui ṭhin. Hetiang a nih avang hian sikul ṭan hma hian naupang leh nu leh pate a tiluhai mai mai zawk niin a lang.
Sikul ban hun a lo hma ta a, thingtlangah chuan kan naupangte sikul han bang hian eng han tih tur vak an nei si lova, enkawltu nei lovin an sapa tal vel mai mai a. Thingtlangah chuan ram tang rual chin tawh chu ram lamah an feh chhuak vek a, in lama in han nghak chin chu tar leh chhumchhia an ni tlangpui a. Hetiang ang tan chuan naupang han kilkawi a, han control ngaihna vak a awm si lo a ni. Chin loh loh an chin phah ang tih pawh a hlauhawm hlel love.
Kan ram angah chuan nipui lai hi chuan sikul ṭan hma hi rokhawlhna vak a awm a rinawm loh. Khua a var hma a, zing lamah pawh dar li velah kan tho tlangpui a, dar riat chu a tlai viau tawh a ni. Thlasik ni-ah erawh chuan dar ruk hnu lamah ni a chhuak chauh a, dar nga leh a chanve velah khua a var fel erh awrh chauh a ni.
Tichuan, dar riata sikul ṭan hman tur chuan chhungkuaa phek buai a ngai a, naupang tam tak phei chu chaw kaw puar ei lovin an kal mai ṭhin. Ni leng lenga chaw kaw puar lova an awm reng chuan an hriselna pawhin a tuar ang tih a hlauhawm.
PTA-in thlasika sikul ṭan tlai an rawtte pawh kha a tuartu leh hre chiangtu ber an ni a, an thiamawm khawp mai. Hetiang a nih avang hian thlasik lai, November aṭanga February thlengte hi chuan dar kua a
ṭan turin emaw tih ni se a fuh viau lovang maw le? Puitling hlir thawhna kan sorkar office-te pawh thlasik lai chuan an ṭan tlaiin an bang hma ṭhin si a.
Sikul ṭan hma sawi a nih tirh kha chuan traffic jam tihrehna tur atan leh ṭhalai meng rei lutuk leh thawhna chang hre lote siam
ṭhat nan khan sawi a ni ṭhin a. Engpawh chu ni se sikul naupang chauh hi traffic ti jam-tu an nih loh hmelin zan meng rei leh thawhna chang hre lote kha sikul naupang an nih hmel loh; tunah pawh office kal lai chuan a jam tho chu a nih si hi!
Sikul chauh ṭan hma tir a, a thawk tak taktu, kan office kaite ṭan hma tir chuan si loh hi chu thil nihphung tur pawh a ni thei dawn em ni le?
Kan work culture thlak kan duh tak tak a nih chuan kan office kaihote pawh dar riatah ṭan ve se, kan Minister-te ngei pawh hi dar riatah chuan office-ah ṭhu ve se. Hetiang kan ti thei lo a nih chuan sikul ṭan hun pawh hi tun hma ang khan, a ngaiin kal leh mai se a
ṭha viau lo ang maw?
- Patrick Z, Chhingchhip