MLA Lalduhoma chuan, Union Home minister Amit Shah-a'n Mizorama Joint NGO hruaitute hnena ILP tihchak a sawi chu a lawmawm rualin, Citizenship Amendment Bill (CAB) an pass tho si chuan Mizo hnam tan a him phah dawn lo tih a sawi a, "CAB leh ILP hian inkungkaihna a nei lo," a ti.

Nimin khan ZPM pisaa inkhawmah thu sawiin Lalduh­oma chuan, "Amit Shah-a'n Mizo tlangval hlang awmna CRP battalion din a sawi kha, recruitment rules kalh tlat a ni a, thil theih a ni lo. Recruitment rules kalha an la a nih pawhin, Mizote'n CAB kan duh lohna chhan - Chakma foreigner, Buddhist sakhaw zuitute lo luhna ber Bangladesh border saw CRP duty-na area a ni lo hrim hrim," a ti a; sorkar laipuiin CAB an pass a nih chuan, Mizo tlangval hlang awmna CRP battalion eng zat pawh din se, Mizote an him phah dawn lo tih a sawi.

Lalduhoma chuan, ramri veng turin India sorkarin Burma ramri-ah Assam Rifles a dah a, Tibet border-ah Indo-Tibetan Border Police (ITBP), Bangaladesh border-ah Border Security Force (BSF)-te a dah tih a sawi a, "CRP chu internal security (ram chhung himna) atana din, paramilitary force an ni," a ti.

MLA dang Dr Vanlalthlana pawhin thu sawiin, "Mizoram mipui 60% aia tam innghahna agriculture hian ngaih pawimawh a hlawh lo hle a, kan buh thar pawh a tlahniam mek a ni," a ti a; kum 2000-01 ah ram hectare khatah buh kg. 2,000 a nih laiin, kum 2017-18 ah chuan hectare khat zelah kg. 1,650 chauh thar a nih thu leh, Agriculture department-ah research tih nan cheng nuai 2 chauh dah a ni chu lungchhiat thlak a tih thu a sawi.

Dr Vanlalthlana chuan, Mizoramah thingtlang mite'n an eizawnna atana lo an hâl ṭhin khû aiin, motor khûin boruak a tihbawlhhlawh nasat zawk a rin thu sawiin, "Kan boruak chhiat thu kan sawi fo a, Motor Vehicles Act, 1988 Section 56-in motor fitness chungchang a tarlan angin motor-te endik a ni lo a, Aizawl­ah pawh hmun hnihah chauh khu endikna a awm. Mechanic thiam takin motor khûte hi uluk takin endik se, hei ai hian boruak a thianghlim ngei ang," a ti.

Share this Post