MLP Act hmanga zu khap a nih leh hnuah Vairengteah zu ûm 5573 man tawh

Vairengtea awm Excise & Narcotics department (END) staff-te chuan Mizoram Liqour Prohibition (MLP) Act hman a nih hnuah sap zu ûm puitling 5,573 an man tawh.

Vanglaini palai zawhna chhanga Vairengtea END duty-te sawi danin, MLP Act hman a nih hnuah sap zu ûm puitling 5,573 an man tawh bakah, ûm chanve 900, beer ml. 650 ûm 63 leh ml. 500 búr (can) 318, rakzu litre 33.500, dawidim (yeast) kgs. 4.400 leh lirthei panga an man tawh. Zu kaihhnawihah hian mi 13 an man a, zu kaihhnawiha thubuai an ziah luh zat chu 36 a ni.

Zu bakah hian MLP Act hman a nih hnuah Vairengte END-te chuan heroin gram 30.400, ganja kg. 8.200, pseudophedrine (khehpuam) kg. 90.692 an man tawh a; ruihhlo kaihhnawihah hian mi 12 manin, thubuai pariat an siam tawh.

Vairengtea END-ah hian officer in-charge (OC) bakah sub-inspector pahnih leh assistant sub-inspector pakhat leh gate-a duty tur mi 15 vel an awm a; hmun pathumah inṭhenin an induty chhâwk ṭhin a, duty apiangin SI leh ASI-in an ho ṭhin. Hetih lai hian, NDPS Act hnuaia thubuai chu ASI-in an buaipui theih loh avangin ASI hoa man a nih pawhin Court-ah chuan SI-in an kalpui ṭhin.

Vairengte END-te'n mi an man, thubuai an siamsakte chu Kolasib District Court-ah an hruai ṭhin a ni. Vairengtea END hian motor pakhat an kawl mek a ni.



Share this Post

Login to comment
No Comments