Bru-te'n an camp-ah kawng an zawh

Tripura refugee camp-a Bru-te chuan n­imin khan sorkar laipuiin October 1, 2019 aṭanga chhawmdawlna an pek ṭhin a tihtàwp avang leh Mizo­rama an kîr duh loh lantir nan kawng an zawh. Hetih lai hian, Bru lâk lêt vawi 9-na thawh hnihna kal mekah chhungkaw 129 Mizoramah hruai kîr an ni tawh.

Bru relief camp-a Mizoram khua leh tuite Mizorama lak let hna thawh mekah hian, October 19, 2019 thleng khan chhungkaw 125 hruai kîr an ni tawh a; nimin khan Mamit district mi leh sa chhungkaw pali chu anmahni thuin Mizoram ah an rawn kîr a, chungte nen chuan Bru lak let vawi 9-na thawh hnihnaa lak lêt zawng zawng chu chhungkaw 129 an ni.

Nimina anmahni thua Mizorama lêt Bru chhungkaw palite chu Kanhmunah sorkar official-te'n an lo dawngsawng a; an awmna tur Sihthiang leh Saikhawthlir lam panin sorkar official-te'n an hruai nghal. Kolasib leh Lunglei district mi leh sa erawh nimin lamah hruai kîr an awm lo.

Heti hian, Bru lak let vawi 9-na thawh hnihnaa Tripura-a camp paruk aṭanga Mizoram khua leh tui hruai kìrte chu Mizoram district pathum - Mamit, Kolasib leh Lunglei district-ahte dah an ni a; hruai kîr tawh chhungkaw 129-te chu Mamit district-ah chhung­kaw 74, Kolasib dis­trict-ah chhungkaw pasarih leh Lunglei district-ah chhungkaw 48 dah an ni.

October 19 thlenga Mamit district mi lâk lêt tawhte chu Borai, Réngdil, Tumpánglui, Tuidam, Tuipuibari, Kolalian, Búngṭhuam leh Mamit Bazar Vengahte dah an ni. Lunglei district mi chhungkaw paruk lâk lêt an ni tawh a; Chawilung khuaah chhungkaw pa­khat, Bûknuamah chhung­kaw pakhat leh Dintharah chhungkaw pali dah an ni.

Kolasib DC Zoeng­sanga'n Vanglaini a hrilh danin, Bru lâk lêt vawi 9-na thawh hnihnaah hian Kolasib district mi chhungkaw pasarih hruai kîr tawhte chu Hortoki, Meidum, South Chhimluang leh North Thinglian khuaahte dah an ni.

Bru hruai kîrte chu an awmna tur district-a DC-te'n chhawmdawlna hmasa an pe nghal zel a; an awmna tur khuaa in sakna tur Rs. 1,50,000 aṭangin first instalment Rs. 25,000 te, thla tin chhawmdawlna Rs. 5,000 leh thla khat daih ration buhfai pek an ni. Bank account nei tawhte hnenah an sum dawn tur Rs. 4,00,000 chu a hma thei ang berin dahsak zel a ni bawk.

Tripura aṭanga Mizoram khua leh tui Bru lak let hna hi November 30, 2019 thleng thawh tura ruahman a ni.

Mamit DC Dr Lalrozama chuan Vanglaini palai zawhna chhangin, nimina Bru hruai kîr hna thawh tum chu Bru hote'n an camp-ah kawng an zawh avangin an hlawhtling lo tih a sawi a, "Bru lak lêtnaah hian Bru pawlte office kan hmang mai ṭhin a, vawiin (nimin)-ah chuan kawng an zawh avangin kan inngaihsak hman lo tláng a ni," a ti.

Dr Lalrozama chuan, camp aṭanga hruai ni lo a, anmahni thua Mizoram pan an awm zauh zauh ṭhin avangin, Kanhmunah anmahni lo dawnsawnna tur centre an siam chawp tih a sawi a, chu chu Bru repatriation plan-a tel sa lo a nih thu a sawi bawk.




Share this Post

Login to comment
No Comments