RUSA-a assistant professor 72 lakte appointment pek thuai a ni ang - HTE Minister

Higher & Technical Education (HTE) minister Dr R Lalthangliana chuan, Rashtriya Uchchatar Shiksha Abhiyan (RUSA) hnuaia college hrang  hranga thawk tur assistant professor 72, MPSC kaltlanga lâk tharte chu appointment letter pek thuai an nih tur thu Vanglaini palai zawhna chhángin a sawi.

Dr R Lalthangliana chuan, assistant professor turte chuan thawk thuai se tih chu an duh dan a nih thu sawiin, "Law & Judicial department lamah 'vet' a ngai a, hun a duh rei a ni. Council of Minister thutlukna a nih avangin tunah hian Chief Minister-ah file a awm mek a, vawiinah (niminah) file a rawn lêt beisei a ni,"  a ti.

A hnena file a lêt hunah appointment order pek theih a nih tur thu sawiin HTE Minister chuan, "Appointment order pek chhuah a nih hmain an zawm duh leh duh loh kan zawt phawt ang a, ni 10 vel hun pek an ni ang," a ti a; a zawm duhte chu a rang lama appointment order pek an nih dawn thu a sawi.

Kum hnih hnua chhawr chhunzawm zel an nih dawn leh dawn loh zawhna chhangin R Lalthangliana chuan, "Chhawr chhunzawm zel an nih ngei ka beisei. Tun aṭanga kum hnih velah chuan college zirtirtu indaih lohna hi 200 chuang a ni dawn a, mamawh pawh kan mamawh tawh dawn hrim hrim. Chhawr chhunzawm ka beisei rual­in, kan chhawr chhunzawm ngei ang tia intiam erawh ka duh lo," a ti.

RUSA hnuaia assistant professor tur mi 72-te hi Mizoram Public Service Commission kal­tlangin July 12, 2019 khan lâk an ni a, he thu ziah lai thleng hian appointment order pek an la ni lo.

Assistant professor 72-te hlawh tur chu sor­kar laipui (RUSA)-in kum hnih chhung 90% a tum dawn a, 10% chu state sorkar tum tur a ni. RUSA guidelines-ah chuan, kum hnih hnuah chuan RUSA assistant professor-te chu state sorkarin a lak tura ziah a ni.

RUSA hnuaia assistant professor tura MPSC-in a thlan tawhte chu September 30, 2019-a Cabinet meeting chuan kum hnih chhung atana lak a lo pawm tawh a, kum hnih hnua an awm dan turah erawh thutlukna an siam lo. Assistant professor turte chu 7th Pay hnuaiah dah an ni a, thla khata Rs. 70,000 hlawh tura pawm a ni.




Share this Post

Login to comment
No Comments