Kum 2018-19-ah HIV+ve mi 2,765 hmu

Sorkar kum liam ta, 2018-19 chhungin Mizoramah HIV hrik pai hmuh chhuah thar mi 2,765 an awm. Mizoram State AIDS Control Society (MSACS) hotute chuan, National AIDS Control Organisation (NACO)-ah MSACS-in a hranpain HIV hrik pai zat thehluh a ni ngai lo niin an sawi.

MSACS hnuaia Integrated Counselling and Testing Centre (ICTC) tina counsellor-te'n ni tin leh thla tina HIV+ve an chhinchhiah dan NACO-a an thawn aṭanga a lan danin, kum 2018-19 chhunga HIV hrik pai hmuh chhuah mi 2,765 zinga mi 1,770 (64.01%) chu high risk group (HIV kai mai tura ngaih) ni lote an ni.

High risk group tia sawi - ruihhlo/damdawia inchiu ṭhin (IDU), female sex worker (KS) leh mipa mahni anpui kawp (MSM) zinga hmuh chhuah zat chu 995 (35.99%) an ni thung.

Kum 2018-19 chhunga Mizo­rama HIV+ve hmuh chhuah thar zat mi 2,765 hi kum khata ni awm zat 365 aṭanga chawhrualin, HIV vei thar hmuh chhuah ni tin mi 7.58 an awm ang a ni. Thla khatah ni 25 pisa kai hun anga chhût chuan, hmuh chhuah thar ni tin mi 9.2 zel an awm ang a ni bawk.

High risk group zinga HIV+ve kum 2018-19 chhunga hmuh chhuahte chu ruihhloa inchiu ṭhin mi 932, KS an tih ang chi mi 11 leh mipa mahni anpui kawp mi 52 an ni. IDU, KS leh MSM ni lo HIV+ve hmuh chhuah mi 1,770-te chungchangah MSACS hotute chuan, "Mi 1,770-te hi high risk group zinga mi an nih loh avangin, data aṭang chuan mi nun tluang pangngaia ngaih an ni," an ti.

Mizoramah HIV/AIDS vei thar an pun zel avangin mi ṭhen­khat chuan MSACS chu sorkar laipui aṭanga sum hmuh tam duh vanga HIV vei zat ziak tam anga sawi a awm ṭhin chungchangah MSACS hotu­te chuan, MSACS office-in a hran­pain HIV positive report NACO-ah an thawn ngai lo niin an sawi.

MSACS project director Dr Lalthlengliani chuan, "MSACS office chuan NACO-ah HIV+ve zat a hranpain kan thawn ngai lo a, stand alone ICTC hrang hrangin Strategic Information Manage­ment System (SIMS) hmangin thla tin report an pe ṭhin," a ti.

MSACS hotute sawi danin, ICTC-ah HIV diagnosis confirm ṭhin a ni a, chutah chuan pre-test counselling-ah a hmain enfiah an ni tawh em tih te, HIV positive tawh an nih leh nih lohte zawhfiah an ni ṭhin a, HIV+ve tih hriat sate chu thisen endik nawn a ni ngai lo.

HIV+ve te chu post test counselling neihpui leh an ni ṭhin a; an address kimchang leh an mahni hriat theihna tur te, HIV an kai dan te, an inenkawl dan tur leh tih turte chiang taka hrilh ṭhin an ni.

HIV+ve finfiah tawhte chu PLHIV ART Linkage System (PALS)-ah an khung a, PALS-ah chuan HIV+ve hming, kum, nu leh pa hming, enkawltu hming leh address leh address tichiangtu tur voter ID/Aadhaar card-te thun tel a ni. PALS-ah hian anmahni hriatna tur number 23 system pek an ni a, chu number chu ART Centre-ah damdawi an lak dawnin PALS-ah bawk an thun leh bawk. Thla tin SIMS hmangin ICTC tinin a hrang ṭheuhin NACO report an pe ṭhin.

PALS leh SIMS chu MSACS office-a mawhphurhna nei bikte'n password hmangin an lo hmu ve thei a, mahse tihdanglam theih an nei lo a, SIMS centre hrang hrangin thla tina report an thehluh leh PALS chu a inmil tur a ni.

MSACS hotute chuan, HIV+ve tharte chu hming inang awm pawh ni se, ID card hrang hrangte nen chhinchhiah vek a nih avangin mi pakhat chhin­chhiah nawn thei lo niin an sawi a, "HIV+ve tharte hi phuahchawpa a zat ziah mai chi a ni lo," an ti.

An sawi danin, HIV+ve hmuh thar an awmin councellor-te'n ART centre-ah an kaltir ngei tur a ni a, SIMS leh PALS aṭanga MSACS leh NACO-in ni tin leh thla tina an lo hmuh ve zel avangin, HIV+ve tharte chu ART centre-ah damdawi lamtir ngei tur a ni. HIV kaiin ART-ah damdawi a lak loh chuan MSACS leh NACO aṭangin an lak loh chhan zawh an ni ṭhin.

Dr Lalthlengliani chuan, MSACS-in kum tin NACO-ah annual action plan (AAP) an thehlut ṭhin tih sawiin, "AAP format hi NACO-in a siam sa a ni a, unit cost/rate bituk sa vek a ni a, HIV positive zat ziah lanna tur a awm lo," a ti.

MSACS Project Director sawi danin, National AIDS Control Program (NACP) chu NACO kaihhruaina anga kalpui a ni a, phase hrang hrang awmin, tunah phase IV-ah an awm mek. Phase I leh II hun laia an dawn ṭhin awareness tihna tur sum an dawng tawh lo a, pawl hrang hrangin MSACS-a thawkte sáwm a, awareness campaign neih paha sponsor an dil ṭhin chu tunah chuan dil a rem tawh lo. Chutih rualin, awareness campaign chu mamawh an awm chuan resource person tur an ngaihtuahsak thei a ni.





Share this Post

Login to comment
No Comments