Mizo zirlai 2-in INSPIRE Award an dawng

Innovation in Science Pursuit for Inspired Research (INSPIRE) kaltlanga October 9-11, 2023 chhunga Delhi-a 10th National Exhibition & Project Competition buatsaihah Mizoram aiawha tel zinga zirlai pahnihin INSPIRE Awards MANAK (Million Minds Augmenting National Aspirations and Knowledge) an dawng.

10th National Exhibition & Project Competition-ah hian India ram pumpui aṭangin zirlai 441 an tel a, a ti ṭha zual zirlai 60 hnenah INSPIRE Awards MANAK hlan a ni.
INSPIRE Awards MANAK hi Mizoram aṭanga telte aṭangin John Lalhruaitluanga, Sacred Heart School, Lunglei leh Lalhmingsangi, JNV, Khawzawl ten an dawng a; an pahnih hian National Innovation Foundation (NIF)-in an model/exhibit-te chu a taka siam chhuak tur leh patent turin an bawhzuisak dawn a, award dawngtute tana buatsaih ṭhin Japan rama SAKURA programme-ah an tel bawk ang.

INSPIRE Awards MANAK hi sorkar laipuia Department of Science & Technology buatsaih niin, kum 2009-ah kalpui ṭan a ni a; pawl 6 aṭanga 10, kum 10-15 inkarte tana ruahman niin, state level competition neih hnuah a ti ṭhate tan national level competition buatsaih a ni ṭhin.

Intihsiaknaah hian Mizoram aṭangin lawmman dawngtute bakah, K Darthangmawia, Kids Care School, Aizawl-te an tel a; SCERT deputy director F Lalliansanga leh NIF state coordinator Lalbikzuala ten an ṭawiawm a ni.