MPF-in inkhawmpui lian an hmang; Pathiannia vote chhiar ṭha an ti lo
Mizoram People Forum (MPF) chuan nimin khan Mission Veng Kohhran Hall-ah Annual General Meeting vawi 16-na an hmang a; Mizoram Legislative Assembly inthlanpuia vote chhiar ni atan December 3, 2023 Pathianni ruat a ni chu ṭha an ti lo a, sawn turin Election Commission of India (ECI)-ah ngen an rêl. Mizoram Kohhran Hruaitute Committee (MKHC) pawhin nizan khan ECI-a thu thlen tur chungchang an ngaihtuah.
MPF inkhawmpui hian resolution an siam a, "ECI chuan Mizoram State Assembly inthlan hun atan November 7, 2023 a ruat a, vote chhiar hun atan December 3, 2023 a ruat bawk a. Vote chhiar ní atan December 3, Pathianni ruat a ni hi MPF chuan ṭha a ti lo a. Kristian state tih theih khawpa Mizote zaa za Kristian awmnaah hian Pathianni chu ni serh, Pathian kan biakna ní a nih avangin vote chhiar ní atana hman hi a remchang lo kan ti. Chuvangin, vote chhiar ní atan hian Inrinni leh Pathianni ni lo ni dang ruat ṭha leh turin ECI-ah ngen ni se kan ti," an ti a ni.
MKHC chairman Rev. Dr C Chawnghmingliana chuan, vote chhiar hun atana Pathianni ruat a ni chu ṭha an tih loh thu sawiin, "Zanin (Thawhlehni zan) hian emergency meeting neiin kan ngaihtuah dawn," a ti a; Vanglaini zawhna chhángin, thuchhuah an siam bakah, ECI-ah ngenna an thawn a rinawm thu a sawi.
Synod moderator ni bawk Rev. Dr C Chawnghmingliana chuan, Mizoram Synod Officers' Meeting pawhin vote chhiar hun atana Pathianni ruat chungchang chu October 14, Inrinniah an ngaihtuah dawn a, Synod angin thuchhuak an neih a rinawm thu a sawi bawk.
Nimina MPF Annual General Meeting-ah hian MPF local forum, constituency forum, district forum leh constituent member-te aṭangin aiawh an tel. Chawhma inkhawm chu MPF president Rev. Dr C Chawnghmingliana'n a kaihruai a, MPF general secretary hlui Upa Lalramthanga'n 'MPF kalphung leh hmalak dan tur' tih thupui a sawi bakah, report hrang hrang ngaihthlak a ni.
Chawhnu lam inkhawm chu MPF vice president Nghaklianmawia'n a kaihruai a, Rev. K Lalrinmawia'n 'Huapzo sorkar kan mamawh' tih thupui a sawi a, sawihona hun hman nghal a ni.
MPF treasurer Lalliani leh finance secretary Vanlalthanga te tarlan danin, MPF-in kum 2022-23 chhunga sum a hmuh zawng zawng chu Rs 18,14,605 a ni a, kum 2023-24 atana budget chu Rs 16,48,000 niin, kum 2024-25 atana budget ruahman chu Rs 14,03,000 a ni.
MPF hi June 21, 2006-ah din niin, Mizoramah inthlanna thianghlim, zalen leh muanawm a awm theihna tura din a ni a, kohhran leh tlawmngai pawl hrang hrang an tel.
Mizorama political party-te nen thawhhona thuthlung an ziak ṭhin. Tuna thawhhona thuthlung hman mek chu February 28, 2023 khan ziah a ni a, MPF President leh General Secretary bakah, political party tin president ten hming an ziah hnan tih MPF general secretary Rev. Lalramliana Pachuau chuan a tarlang.
MPF-A TELTE
1. Mizoram Presbyterian Kohhran
2. Roman Catholic
3. Lairam Isua Krista Baptist Kohhran
4. Evangelical Church of Maraland
5. Evangelical Church of India
6 Evangelical Free Church of India
7. Weslyan Methodist Church
8. Central YMA
9. MHIP Gen.Hqrs
10. Mizoram Upa Pawl
11. Young Lai Association
12. Mara Thutliya Py