ZPM (Ind) MLA pangin bànna an thehlut

Kum 2018 Assembly inthlana ZPM (independent) candidate nia thlan tlin MLA pangate chuan nimin khan MLA aṭanga bànna Assembly speaker Lalrinliana Sailo hnenah an thehlut a, MLA aṭanga an bànna chu Assembly Speaker chuan a lo pawm nghal. Heti hian Mizoram State Legislative Assembly pariatna kal mekah MLA pasarihin bànna an thehlut tawh.

MLA aṭanga bànna thehluttute chu - Aizawl North-I bialtu Vanlalhlana, Aizawl North-II bialtu Dr Vanlalthlana, Aizawl West-III bialtu VL Zaithanzama, Aizawl South-I bialtu C Lalsawivunga leh Aizawl South-II bialtu Lalchhuanthanga te an ni.

ZPM Legislature Party secretary Dr Vanlalthlana, banna thehluttute zinga miin Vanglaini palai zawhna a chhàn danin, kum 2018 inthlanah ZPM candidate ni mah se, khatih lai khan ZPM chu Election Commission of India-ah an la inziah luh loh avangin independent candidate angin inthlan an chuh a, independent MLA an ni.

Tunah chuan ZPM chu ECI register party a ni tawh a, kumina MLA inthlanpuiah ZPM anga an chuh leh dawn chuan MLA aṭanga bàn theih an nih dawn avangin bànna an thehlut a, nomination paper an thehluh hunah pawh MLA ni lai an ni tawh dawn lo a ni.

Kum 2018 inthlana ZPM (independent) aṭanga thlan tlin dang, Lalduhoma erawh chu Assembly Speaker-in November 27, 2020-ah MLA aṭanga a bàn hnuah, April 17, 2021-a Serchhip by-election-ah ZPM party official candidate nia thlan tlin leh a ni a, chuvang chuan MLA aṭangin bànna a thehlut ve lo thung.

Kum 2018 inthlanpuia thlan tlin zingah nimin thleng khan MLA pasarihin MLA aṭanga bànna an thehlut tawh. Palak biala Indian National Congress aṭanga thlan tlin KT Rokhaw chuan October 3, 2023 khan bànna a thehlut a; Saiha biala MNF aṭanga thlan tlin Dr K Beichhua pawhin October 5, 2023 khan bànna a lo thehlut tawh bawk.