Kawngpui neih chhun enkawl thei lo?

Lirthei neitu leh khalhtu páwl hrang hrangin an din, Joint Action Committee (JAC) chuan Vairengte - Sairang inkar kawngpui chu tlânna tlâka thawm ṭhat a nih hma chuan October 9, 2023 zing dar 7 aṭangin an lirtheite tlàntir rih loh an tum thu an puang.

He pawl hruaitute sawi danin kawngpui ṭhatna tura hmalak dan ngaihtuah turin lirthei neitu leh khalhtu pawl hrang hrangte'n JAC an din a, "Sorkar dodal ngawr ngawr leh mipui harsatna siam tum kan ni lo. Kan harsatna tawh hi hre lo tam tak an awm ngei ang a, Mizo mipui hian hre ve se kan duh a ni," tiin kawngpui chhiat avanga an harsatna tawh an puang.

Tunah hian Mizorama kawng pawimawh hrang hrang hi a chhe hle mai a, Vairengte leh Sairang inkar kawngpui chu lirthei zawh hleihtheih loh khawpin a chhia a, Mizorama kawngpui pawimawh bera chhak ngam hi lirthei táng leh kawngpui chhiat avanga chesual a khát tàwkin an awm. Manipur lama kan unauten kan ram aṭanga châk lâkluhna atana an hman, Manipur panna kawng Kawlkulh leh Hliappui inkar a chhe hle a, Champhai tlangdung lamah pawh Kawlkulh - Tuichâng a chhe hle bawk a; Assam panna kawngpui helna Serkhan - Bagha road chu North Hlimen leh Saipum inkar kal harsa khawpin a chhia a, lirthei rit phur tán chuan tlan hleihtheih a ni lo.

Kan rama kawngpui zawng zawng hi a ṭha kim seng lo a nih pawhin a pawimawh bîk tal hi chu vil hneh theih dan awm se, a enkawltu leh siam tura an tihte chu tu contractor pawh ni se; huaisen taka vil ngam sorkar kan mamawh a, contractor-ten an hlauh tur sorkar kan mamawh tawh hle a ni.

Tunah hi chuan sorkar lamin contractor thiam lohah a luh fai deuh vek thei a, chutih laiin kan state chhunga kawngpui laih leh enkawl hna vilpui theitu, kan kawngpui nei chhun ang ang siam ṭha thei tur sorkar kan mamawh a; kawng chhawng kan la nei thei lo a nih pawhin a chhawng lo a awm sâ tal hi sorkar hian vil hneh deuh rawh se.