Vanglaini - PM special aircraft hmingah Air Force One vuah maithei

KHAWTHLIR

Secretary puitling

Appointments Committee of the Cabinet chuan Mizoram sorkara chief secretary ni mek Lalnunmawia Chuaungo chu sorkar laipuia secretary puitling (rank)-ah a hlângkai. Lalnunmawia Chuaungo hi 1987 batch IAS, Gujarat cadre a ni.

Thisen pe

Mara Thyutlia Py (MTP) Siaha College Vaih Branch chuan MTP Day pualin nimin khan Siaha District Hospital tan thisen unit 34 an pe a, a petute mipa 24 leh hmeichhia 10 an ni.

Zote S-in lawm

Zote South khua chuan hun rei tak chhung Lunglei district-a an awm hnuah, tun hnaia Mizoram sorkarin Serchhip district-a a dah chu nimin khan an khaw community hall-ah an lâwm.

NBHM siam thar

National Board for Higher Mathematics (NBHM) chuan Mizoram tan bik NBHM Mizoram Region a siam thar a, Mizoram regional coordinator atan Dr LP Lalduhawma a ruat nghal bawk. Dr LP Lalduhawma hi Pachhunga University-a assistant professor a ni.

Environment Awareness

UPC North East India chhunga Aizawl East District PYD hnuaia Environment Committee leh ASEP chuan October 8, Thawhlehni zan khan Bawngkawn UPC Kohhran Hall-ah Environment Awareness Campaign an buatsaih a, pastor bial hrang hrang aṭangin PYD hruaitu mi 150 vel an tel.

Tripura-a awm hlen turin duhsak

MPC party chuan thuchhuah siamin, Bru-te chu anmahni duh thu ngeia Mizoram chhuahsantute an nih thu an tarlang a, "Mizorama lo kîr duh tawh loa Tripura-a chàm hlen duh zawktute hi an duhthlanna ang ngei hian Tripura-ah chêng hlen mai se kan duhsak hle a ni," an ti. Bru-te'n Mizorama an duhthála an khawsak theihna tura phût an neihte chu Mizo hnam leh sakhaw tana him lo thei a nih avangin, tihhlawhtlin chia an ngaih loh thu an puang bawk.

Project training

Lawngtlai DC Shashanka Ala hmalaknaa Lawngtlai district-a 'Kan sikul, kan huan' project kalpui mek thawh hnihna (phase-II) atana thlan sikul leh anganwadi centre-a zirtirtu leh thawktute tan nimin khan Lawngtlai district-a RD block hrang hrangah hmalak dan tur inzirtirna buatsaih a ni.

DAWNTISEI

PM special aircraft hmingah Air Force One vuah maithei

Prime minister Narendra Modi-a special aircraft thar tur, nakkum June thlaa India hnena pek tur chu Air Force One tia vuah a ni mai thei nia sawi a ni.

PM special aircraft thar tur, Boeing 777-300ER hi Dallas-a Boeing hmunah siam mek niin, nakkum June thla hian New Delhi a rawn thlen beisei a ni. He aircraft-ah hian missile defence system pawh dah niin, US president Donald Trump-a hman, Boeing 747-200B tluka him tura duan a ni.

President, Vice president leh prime minister-te hian rampawna an zinchhuah pawhin state-run airline Air India an hmang tlangpui ṭhin. Hmun hla vak lo zinna atan chuan Indian Air Force Communication Squadron VVIP fleet thlawhtheihna an hmang thung.

Share this Post

Login to comment

No Comments