Silly Point: 2023 ICC Cricket World Cup
Cricket khawvelin hun rei tak chhunga a lo nghahhlelh leh urlawk, 2023 Cricket World Cup chu October 5, Ningani khan Ahmedabad-ah khuhhawnna neih a ni ta. New Zealand chuan kum li liam taa hliam leh rilru na tuamdamna tlaikhawhnuah an nei a, final-a an vanduaina team England lakah phuba an la. Kiwis hian champion lai England an sawp!
India Daifim
Kristiante lehkhabu thianghlim Bible chuan dai hi 'siamtharlehna' entir nan a hmang tlangpui. New Zealand hian World Cup final-ah England an hneh lo a, tun ṭum inelna ṭan hma hian series khelhpuiin an hneh lo bawk. Opening match-ah erawh Kiwis hian England lakah siamtharlehna an chang a, Three Lions hi dawl zawrin an zawr.
Chawhnu dar 2:00-a Ahmedabad ni sen sa hnuaia vaw hmasa England batman-ten New Zealand spinner-ten khelmual zau hmanga fielder an rem dan an chelh lo a, an 'bazball tactic' lar tak chu a fuh ta lo kan ti thei ang.
Tin, khaw thim hnua dai rawn tlâ chiah khan Davor Conway leh Rachin Ravindra inkawp te kha kawng a hawnsak a, dai tla avanga engtik lai maha vawm hlum hlauhawm dinhmunah ding lo khawpa ball an rawn vaw thei khan inkhel a tikalkhat zo ta a ni. Conway-a kawppui hi Rahul Dravid leh Sachin Tendulkar an ngaihsan avanga a nu leh pa ten a sakhmingah India legend te hming kaihkawpin Rachin Ravindra tih an vuahsak ngat a ni.
Chutihrualin India ram a ni a, dai a tla. English bowler-ten ball huh chunga vawm ngaihna a hre tawh lo hrilhhai hmel erawh ka hriathiampui hle.
Asia Weekend Special
Vawiin chawhma lamah Asia Derby - Bangladesh leh Afghanistan te hmun zo leh thengthaw nuam Dharamshala lamah kan hmu ang. Dai a tla ve dawn lo. Chutih lai mekin "Cricket World Cup leh thlensan luhai" nei title inhmeh tawh South Africa leh Sri Lanka ten an game hmasa ber India khawpui Delhi-a stadium lar Feroz Shah Kotla lamah an khuh hawng ve thung ang.
Asia Cup khelh zawh chauh a ni a, Bangladesh leh Afghanistan te tan nomawi a la hlaah a ngaih theih. Sri Lanka pawhin final thleng mah se India laka nasa taka an mualpho avangin nomawi chawi chu an inbeisei phak a rinawm lo.
Sunday nghahhlelhawm
Kar hmasa lawka World Cup inpuahchah nana Series khel zo hlim, World Champion ni ngun ber Australia leh rinkai ber leh thlengtu Branch India te chu, Inrinni lama Bharat hmar lam thlengtute an buai zawh hnu, chhim lam inkhawmpui pandal zartu pakhat, Chennai lamah an inkhuainuai veleh dawn a nih kha. A va nghahlelhawm tak êm.
Rohit a leh a hote
Bul ṭan hma hauhin, India team chu harsatnain a tlakbuak nghal. Kumin 2023-a International Cricket a run siam hnem ber ni mek leh Asia Cup-a tuma khawih phak loh khawpa che ṭha opener Shubman Gill chu 'dengue' a vei tih hmuhchhuah a ni.
October 8, Pathianni hian inlan thei tak maw? A lo thei ta lo a nih pawhin kaptan Rohit Sharma kawppui turin Ishan Kishan a awm thei ang. Kishan hi tun hnaia a ṭhiante damloh leh inhliam zar zoa, enchhina chi hrang hrang paltlang a ni. Meialh leh chhumpui fiahna paltlang World Cup team tur puan a lo hun meuh chuan Ishan Kishan hi team a tel satliah ni loin starting 11-ah a awm thei tlat.
Chennai boruak thlirin
Southwest Monsoon, Zofaten fur tia kan vuah chu India ramah a inlamlet ṭan mek a. Hetah tak hian TamilNadu state hi India ram hmun tina sikni êng kan hman lai Sahmulphah Thla leh Pawltlak thla hi ruahtui an dawn tam hun a ni ṭhin.
Chumi hun chu a inmung chho ṭan ve mek a. Pathianniah hian Chennai khua a duai a, chhum a tam chuan dai a tla dawn loa, khua a thian ṭhat a, chhun lamah ni a sat ṭhat vaih erawh chuan tlai thim hlim aṭangin dai a tla dawn tih sawi lawk tur hian zawlnei nih kher a ngai lo.
Chepauk pitch enin tun dinhmunah chuan a ro ṭha a, nimin lamah, pitch enkawltuin hnim ṭhenkhat an rawt kawlh deuh hnuin, pitch chu a sen uk lampang rawng a ni tih hmuh a ni. Hei hian Indian team-te hi an spinner neih pathumte an khelh tir vek pawhin thil mak a ni lo ang.
World Cup-ah hian ram 10 an intum kual vek dawn a, a sang paliin semifinal an khel dawn. India-in boruak sang ngam Australia aṭangin bul an ṭan a, chhuanlam siam erawh a thiang lo. Bul ṭan nana chak loh chu a 'Hit lutuk dawn lo' tih hre rengin, HIT MAN a leh a hote hi World Cup duhsakna sang ber kan hlan e.