India coach Stimac-a'n contract thar a ziak

All India Football Federation (AIFF) chuan Indian football team enkawltu Igor Stimac-a contract chu kum hnihin an pawtsei a, June 2026 thleng Blue Tigers hi a enkawl ang - World Cup 2026 qualifier-ah India hi third round a hruai thleng a nih chuan kum hnih dangin a contract hi pawhsei leh theih a ni dawn bawk a ni.

AIFF secretary general Dr Shaji Prabhakran chuan, "Tun hnai thla 12 chhungin Indian football team-in result ṭha tak tak neiin, hmasawnna kan hmu nasa êm êm a, hei vang hian Executive Committee te nena inberawn chungin, coaching staff-te rei zawk contract pek kan ti ta a ni," a ti a, Stimac bakah hian assistant coach Mahesh Gawali contract pawh pawhsei niin, Indian football legend Gawali hian India Under-23 team a enkawl nghal bawk ang.

Kum 56 mi Stimac hian May 2019 aṭang khan India hi a lo enkawl ṭan tawh a, SAFF Championship-ah vawi hnih champion puiin, Tri-Nation Series leh Hero Intercontinental Cup-ah champion nomawi a chawipui bawk a, Asian Games 2022-ah round of 16 hruai thlengin, kum 13 chhunga Asian Games mipa football-a India-in knockout round an luh leh hmasak ber a ni.

Stimac chuan, "Kei leh ka staff te chunga AIFF-in rinna an nghah avangin ka lawm hle. Hmasawn tura kan hmalaknaa min rintawkzia tihlanna a ni," a ti a, AIFF-in contract thar an zawrh chu a lawm thu a sawi.

World Cup 1998-a Croatia defender rinrawl ni thei Stimac hi Asian Games khelh lai khan AIFF hian contract thar hi an zawrh tawh a, mahse, Bosnia-in an national team enkawl tura an thlithlai nia sawi coach hian Games khelh zawh lamah contract thar hi a ziak ta chauh a ni.

Kum 56 mi Stimac hian a contract hmasaah khan thla khatah USD 24,000 (Rs. 19,97,252.40) a hlawh a, kum khata a hlawh hi USD 288,000 (nuai 239.66) vel a ni. A contract thara a hlawh zat hi tarlan ni lo mah se, a contract hmasa ai chuan a hlawh hnem ngei a rinawm.