Bru leh Mizo inkar thil a ni lo - Police

Mizoram police chuan October 5, 2019-a Linda-i (33) w/o Vanlalvena, Tlangkhang thih dan chu police-in an chhui mek thu sawiin, Bru leh Mizo hnam inkar thil anga lak tur a nih loh thu an tarlang.

Police thuchhuah tarlan danin, Linda-i chu a taksa kâng nasa tak avangin October 3, 2019 zan dar 11-ah Bairabi damdawi-inah hruai a ni a, first aid pek a nih hnuah inenkawl turin Kolasib District Hospital panpui a ni. Kolasib aṭangin Aizawl Civil Hospital-ah thawn a ni a, chuta ṭangin State Referral Hospital-ah hruai lehin, October 4 zan dar 11:30-ah thlenpui a ni. Referral Hospital-a a awm laiin Linda-i chu a hliam tuar loin October 5 tlai dar 4-ah a thi a ni.

Linda-i thih chungchangah hian a unaunu Rangsaiti, South Chhimluang, Kolasib district chuan Linda-i pasal Vanlalvena (Tevena tia koh) (kum 43) s/o LB Sanga, Tlangkhang chu ringhlelin, October 6 khan Mamit Police Station-ah complaint (FIR) a thehlut a; Mamit PS-ah case No. 44/19 dt 6.10.2019 u/s 302 IPC ziah luh niin, Vanlalvena pawh an la nghal a ni.

Mizoram police thuchhuah chuan, investigation aṭanga a lan danin, Linda-i thih chhan chu tihpalh emaw, nupa inkar buaina emaw a ni thei tih sawiin, "Uluk taka chhui mek zel a ni a, tunah chuan tualthah (murder) case anga ngaih a ni. He thihna thlen chhan hi Bru leh Mizo inkar anga lak tur a ni lo a, thihna thlen chhan tak hi dan anga uluk taka chhui zel a ni," a ti.



Share this Post

Login to comment
No Comments