Kumin October 2 aṭanga Faina hapta (Cleanliness Week) hman chu nimin khan hmun hrang hrangah khâr a ni a, faina leh thianghlimna lama thawk ṭhate hnenah chawimawina leh lawmman hlan a ni.

Faina Hapta kharna inkhawm hi Lungleiah chuan Convention Centre-ah neih a ni a, Mizorama khawpui fai thlannaa Lungleiin pahnihna lawmman a lak chu an lawm nghal. Faina Hapta puala inelna kawng hrang hranga neiha ti ṭhate hnenah lawmman hlan a ni.

Siahaah chuan DC conference hall-ah Faina Hapta khârna hun hman a ni, IPRO N Vabeiratlua'n kaihhruaiin, district bawrhsap Bhupesh Chaudhary-a'n lawmmante a sem. DC chuan, Mizorama district capital zingah Siaha chu faina lamah palina a ni tih sawiin, "Town zingah pasarihna kan ni a, a lawmawm viau rualin, ṭan kan lak sauh sauh a ngai," a ti.

Siahaah hian veng fai ber chu College Vaih niin, Meisavaih West leh New Siaha East-I ten an dawt a; chanchinbu zinga faina lam thu ziak ṭha ber chu The Times of Maraland a ni a, Chhim Aw leh Maraland-te chu pahnihna leh pathumna an ni. AH&Vety pisaa chu office fai bera thlan a ni a, Treasury office leh DIET ten an dawt a; sikul zingah Joel Public School fai berin, Meisavaih P/S-I leh Meisatla P/S-I ten an dawt.

Champhaiah chuan IPR Auditorium-ah Faina Hapta khâr a ni a, district bawrhsap Dr Naveen Aggarwal chu khuallian a ni. DC-in Faina Hapta puala intihsiakna hrang hrang lawmman a sem a, Champhaia veng fai ber chu Vengthlang North niin, Hmunhmelṭha leh Kahrawt chu pahnihna leh pathumna an ni.

Sorkar pisa zingah District Research Office a fai ber a, District Court pahnihna niin, Power & Electricity SDO pisa chu pathumna a ni. Sikul fai thlannaah, primary school-ah Champhai P/S-VI, middle school-ah Veng­thlang PES, high school-ah Pinehill Adventist Academy, higher secondary school-ah Champhai HSS-te chu pakhatna an ni.

Serchhipah chuan Serchhip Auditorium-ah Faina Hapta khâr a ni a, DC Sangchhin Chinzah-in hmanpuiin, lawmmante a sem. Faina Hapta puala YMA Chhang intihsiaknaah Hmarveng YMA Chhang chu pakhatna an ni a, Chhimveng YMA Chhang leh Chhiahtlang Chanmary YMA Chhang ten an dawt.

Lawngtlaiah pawh DC Conference Hall-ah Faina Hapta khar a ni a; Faina Hapta hman chhunga restaurant/tea stall leh zirna-in fai leh chanchinbu faina thu ziak ṭha thlante hnenah lawmman hlan niin, The Lawngtlai Post editor Lalngheta Ralte hnenah faina leh thianghlimna lam thu ziak ṭha ber lawmman hlan a ni.

Lawngtlaia sikul fai bera thlan chu Bethel Middle School a ni a, ANM School pahnihna niin, Chandmary P/S-I chu pathumna a ni. Sorkar pisa zingah ANM School Principal office a fai ber a, Medical Superintendent pisa leh District Education Officer pisate'n an dawt.

Mamitah chuan Chhimveng YMA Hall-ah Faina Hapta khârna inkhawm neih a ni a, district bawrhsap Dr Lalrozama'n hmanpuiin, faina lama inelnaa ti ṭhate hnenah lawmman a hlan. Mamitah hian veng fai ber chu Luangpawl a ni a, New Mamit chu pahnihna a ni.

Zirna-in fai thlannaah Category 1-ah Mo­del Primary School pakhatna a ni a, Category 2-ah St Francis of Assisi High School chu pakhatna a ni. Office fai bera thlan chu District Child Protection pisa a ni a; sikul leh college zirlaite tana essay inziahsiakah Lalchhanhima, Mamit HSS-a pawl 12 zirlai chu pakhatna niin, hla inphuahsiakah Lalnunzira, Mamit HSS-a pawl 12 zirlai chu pakhatna a ni bawk.

District khawpui thar Khawzawlah pawh Zaingen YMA Hall-ah Faina Hapta khârna inkhawm neih a ni a, SDO ST Lalvensangi'n kaihruaiin, bawrhsap H Lianzela khuallian a ni. Faina Hapta puala essay inziahsiak, auhla (slogan) inziahsiak, sikul fai, pisa fai leh hotel/restaurant/tea stall faite hnenah lawmman pek a ni.

Share this Post