Health Care Scheme-ah thu dik loa mi hruai sual tumah Dr Thangtea puh

Mizoram Pradesh Congress Committee (MPCC) chuan, minister Dr R Lalthangliana'n Health Care Scheme (HCS) sum chungchang a sawi chu a dik lo tih an tarlang a; dik tâwk lo hmanga mipui hruai sual tum­ah Health Minister an puh.

MPCC chuan, Dr R Lalthangliana'n October 7, 2019-a Mizo Hnam Rûna thu a sawinaah, HCS sum cheng vbc. 150 chuang hman lohin a awm reng a, chu chu kum 10 chhung Congress sorkarin an hre miah lo angin a sawi tih an tarlang a, "Hei hi thu dik tâwk lo hmanga mipui hruai sual tumna a ni a, kohhran upa, rawngbawltu tih atana mawi lo takah kan ngai," an ti.

Congress party chuan, "Dr R  Lalthangliana'n HCS sum vbc. 150 chuang a awm a tih hi HCS sum báwmpui (corpus fund) atana Mizoram sorkarin Asian Development Bank (ADB) aṭanga a hmuh, bank hrang hranga pung tam tak nei tura Finance department-in a dah a ni," an ti a, kum tin sorkar sum tam tak sên belh reng ngai loa HCS a kal theihna tura ruahmanna a nih thu an sawi.

MPCC tarlan danin, Congress sorkarin Mizoram State Health Care Society (MSHCS) chu siam-

ṭhain, ADB aṭanga sum hmuh vbc. 117.80 leh HCS sum hman bâng, a vaiin cheng vbc. 149.6 chu kum 2010-11 aṭangin MSHCS sum báwmpui (corpus fund) atan dah a ni a, a peipun hna chu Finance department kutah dah a ni.

Corpus fund chu Finance department-in bank pali-ah a pung tam thei turin, minister laina hnaite hlâwkpui theih bik loh turin investment an ti a; Mizoram Rural Bank-ah cheng nuai 6,176.75, Mizoram Urban Cooperative Bank-ah nuai 500, Union Bank of India-ah nuai 629.60 leh Industrial Development Bank of India-ah nuai 7654.04 dah a ni (a vaiin nuai 14,960.39).

HCS atana sum corpus fund-a dah bank pali aṭanga a pun dan chu - kum 2010-11 chhungin nuai 735.76, kum 2011-12 chhungin nuai 1,045.27, kum 2012-13 chhungin nuai 734.31 leh kum 2013-14 ah nuai 1,354.67 (projected) a ni. (http://www.iesd.org.in/…/2015-XI-1%20James%20L.%20T.%20Than…)

Congress party chuan, MSHCS sum báwmpui (corpus fund)-a sum chu duh duha hman theih a ni lo a, a pung hmangin Mi­zo­ram sorkarin HCS a kal­pui ta zawk tih an sawi a, "Kum 2011 aṭanga a pung leh medical reimbursement bâng inkhâwl khâwm a tam zel a, tunah phei chuan HCS lian zawka kalpuina tham a lo ni ta a, natna hrang hrang pawh kum 2011-a bul ṭan a nih lai aiin a cover tam thei daih tawh zawk a ni," an ti.

MPCC chuan, Congress ministry-in awmze neia sum an enkawl azarah HCS ṭha leh lian zawka kalpui theitu, a zár zotu chu Dr R Lalthangliana a nih thu sawiin, tuna Health Minister chu Congress ministry kal ta chunga lawmthu sawi tur zawk a nih thu an sawi.

Hemi rual hian MPCC chuan MNF sorkar hmasak laia thil thleng chungchang tarlangin, HCS chu April 1, 2008-ah bul ṭan a ni a, a tìrah chéng vbc. 50 dah a nih thu an sawi a, "Khatih laia Health minister Pu Tlanga fanute hminga Bajaj Allianz-a pawisa dah a nih lai khan damlo medical bill thehlutte'n harsatna an tâwk nasa a, kum 2010-11 chhunga bill táng chu bill thehluh zawng zawng zinga 35% a tling a ni," an ti. (http://www.iesd.org.in/jesd/Journal%20pdf/2015-XI 1%20James%20L.%20T.%20Thanga.pdf).

MPCC tarlan danin, HCS enkawl turin Mizoram State Health Society din a ni a, chutah chuan Chief Mi­nister chu chairman a ni. HCS sum zinga cheng nuai 1,000 chu Health minister R­ Tlang­hming­thanga fate hming­in Bajaj Allianz-ah Fortune Plus policy hnuaiah dah a ni.

HCS corpus fund bank-a dah dan

Mizoram Rural BankNuai 6,176.75

Mizoram Urban Cooperative BankNuai 500

Union Bank of IndiaNuai 629.60

Industrial Development Bank of IndiaNuai 7654.04

BelhkhawmNuai 14,960.39

Bank 4-a HCS sum pung zat

Kum 2010-11Nuai 735.76

Kum 2011-12Nuai 1,045.27

Kum 2012-13Nuai 734.31

Kum 2013-14Nuai 1,354.67





Share this Post

Login to comment
No Comments