Miss Universe 2023 pageant a danglam dawn

Miss Universe 2023 pagaent chu kumin November 18-ah hian El Savador-ah neih ni dawn. Kumina Miss Universe thlanna neih turah hian rules thlak a nih avangin thil danglam eng emaw zat a awm dawn a ni.

Miss Universe thlanna hi kum tina buatsaih ṭhin a ni a, kumin hi a ṭum 72-na tur a ni a. Kum danga an phal ngai loh, pasal nei lai leh fa nei tawhte pawh kumin intihsiaknaah hian tel phalsak an ni ang.

Nikum khan rules hi thlak danglam a ni a, a hma chuan he intihsiaknaah hian nula, pasal nei lo, kum 18-28 inkar chauh tel phal a ni ṭhin. Miss Universe atana thlan chhuah pawh a term chhungin pasal leh fa nei lo tura beisei an ni bawk.

Kumin aṭang chuan pasal nei lai leh fa nei tawhte tel phalsak niin, kum 28 china bithliah pawh tihbo a ni a, kum 18 chung lam chu tel theih vek a ni.

Ram hrang hrangin an ram aiawh tur an thlang tawh a, Pakistan pawhin Miss Universe pageant-ah hian a ṭum khatna atan aiawh tirh an tum a, Dubai company Yugen Group buatsaihin Miss Universe Pakistan hmasa ber atan kum 24 mi, Erica Robin chu thlan a ni.

Nepal aiawh tur, Miss Universe Nepal Jane Dipika Garrett chu plus-size niin, Miss Universe thlanna neih turah hian hmeichhe cher leh ria chauh an nalh lo a, hmeichhe thau leh rit takte pawh an nalh vek tih lantir a tum. 'Beauty standard hi chi khat chauh a awm lo a, hmeichhia tu pawh hi an nihna ang hian an mawiin an nalh vek a ni," a ti.