IASE-ah Ph.D. leh M.Phil. zirna hawng

Institute of Advanced Studies in Education (IASE)-ah Doctor of Phi­losophy (Ph.D.) leh Master of Philosophy (M.Phil) zirna siam thar a ni a, nimin khan chief minister Zoramthanga'n a hawng.

CM Zoramthanga chuan, zirna sang zawk neih theihna tura IASE-ah Ph.D leh M.Phil zirna hawn belh a ni chu lawmawm a tih thu sawiin, "Sorkarin zirna leh hriselna a ngai pawimawh. Hmasawnna tluantling nei tur chuan mihring thiamna leh theihnain hma a sawn tel a ṭul. Zirna hi ei hmu tura mihring buat­saihna piah lamah, thiamna tak tak intuh a, mahni inring tâwk, mihring hmantlak leh ṭangkai siam chhuahna ni se," a ti.

IASE principal Prof. Vanlalhruaii sawi danin, IASE hi secular institution zingah chuan university tih loha Mizorama Ph.D leh M.Phil zir theihna hmasa ber a ni a, zirna hawn tharah hian batch hmasa ber atan Ph.D zirlai pasarih leh M.Phil zirlai pali an awm.

IASE hi kum 1975-ah Mizoram Institute of Education (MIE) tia din a ni a, kum 1997-ah College of Teacher Education (CTE) tih a ni. Kum 2005 aṭangin IASE-a hlan kai a ni a, March 3, 2012 aṭangin IASE angin mumal takin a kal ṭan. IASE Mizoram hi India ram puma B.Ed zirtirna multi-mode programme kalpui awm chhun a ni a; Tata Institute of Social Sciences, Mumbai-in a zir chiannaah, IASE Aizawl inrêlbàwlna chu India ram hmun danga IASE tan pawha entawntlak tiin a tarlang a ni.

Chief Minister hian Sugamya Bharat Abhi­yan hmalaknaa IASE building-a lift siam thar a hawng bawk a, wheel­chair hmangte tana rem­chang siamsakna a ni. Lift siamna atan hian Social Welfare department kaltlangin Rs. 41,03,207 hman a ni.



Share this Post

Login to comment
No Comments