Animal Husbandry & Veterinary (AH&Vety) minister Dr K Beichhua chuan, India ram páwn aṭanga vawk lak luh khapna chu kalpui zel a la ni a, India ram chhung state dang aṭanga vawk lak luh erawh chu phal a ni tawh tih a sawi.

AH&Vety department chuan nimin khan an department Polyclinic conference hall-ah Quarterly Review Meeting an nei a; an hun hmanpuitu AH&Vety Minister chuan, Krismas leh kumthar a hnai tawh a, saa Mizoram intodelh lohna hriain department chuan vawk lak luh khapna thlahdul an remti tih a sawi a ni.

Dr K Beichhua chuan, ram páwn aṭanga vawk lak luh khapna erawh chu kalpui zel a nih thu sawiin, "India ram state dang aṭang chuan dan phal chin angin vawk leh a notê lak luh remtih a ni tawh," a ti a; vawk natna hrilêng do kawnga department hmalakna ṭawiawmtu Home department, Assam Rifles, tlawmngai pawl leh mipui chunga an lawm thu a sawi.

AH&Vety Minister chuan, hnathawh thlir lêtna hun chu tawnhriat inhrilh tawnna leh thawhhona tihṭhatna atan thil ṭangkai a nih thu sawiin, "Minister ka nih vangin engkim ka hre bik lo a, thawktute kaihhruaina ka mamawh reng a ni. Awm hle hle hman loa min turtu nih tum rawh u. Thawhhona boruak nuam siamtu nih i tum ṭheuh ang u," a ti.

Review meeting hi AH&Vety secretary Lalthangpuia Sailo-in a kaihruai a, director Dr Hmarkunga'n an department hmalakna hrang hrangte a tarlang.

Share this Post