Mizoramah bank-te CD ratio a hniam

State Level Bankers’ Committee (SLBC), Mizoram chu nimin khan chief secretary Lalnunmawia Chuaungo leh State Bank of India (SBI) chief general manager (NE Circle) Sunil Kumar Tandon te hoin an ṭhu. Mizoram puma bank-te loan pek chhuah zat credit deposit (CD ) ratio chu 45.46% a nih thu leh, Aizawl district bika bank-te'n loan an pe chhuak tlem a, an CD ratio pawh 36.60% chiah a nih thu an tarlang.

Meeting-ah hian financial year 2019-20 chhunga first quarter April-June 2019 chhunga Mizorama bank hrang hrangte dinhmun te, sorkar laipuiin hma­sawnna programme/scheme hrang hrang bank kaltlanga tihpuitlin tur a tihte bawhzui dan thlirho a ni.

SLBC meeting hian Mizorama bank ṭhenkhat hnenah thingtlanga agriculture loan an pekna tur a thlansak a, chu'ng khuaa mipui hnenah agriculture loan leh self help group hnena loan pe chhuak turin a hriattir a ni. October 1, 2019 aṭanga public sector bank tan bik customer banking hour zing dar 9 aṭanga tlai dar 3 ni ṭhin chu chawhma dar 10 aṭanga tlai dar 4 ni turin an rêl.

Meeting-a tarlan danin, Mizoramah bank chi hrang 29 awmin, public sector bank 14, private sector bank 11, regional rural bank pakhat leh cooperative society bank pahnih an ni a; bank chi hrang 29-te chuan branch awm zat 220 an nei a, public sector bank branch 74, private sector bank branch 43, regional rural bank branch 85 leh cooperative bank branch 18 a ni.

Bank hrang hrangte'n automated teller ma­chine (ATM) booth 176 an nei a; sector bank-te'n ATM booth an neih dan chu - public sector bank-in 126, private sector bank-in 35 leh cooperative bank-in 15 a ni.

Mizorama bank-te'n kumin April-June chhunga sum an hmuh (deposit) zat chu cheng vbc. 10,076.85 a ni a, loan an pek chhuah (advances) zat chu cheng vbc. 4,580.50 niin, chu chu deposit aṭangin 45.46% (CD ratio) a ni.

Mizorama district pariat zinga CD ratio sanna ber Siaha district-ah 89.55% a nih laiin, CD ratio hniamna ber Aizawl district-ah chuan 36.60% chiah a ni.

Meeting statement-a tarlan danin Bank zingah CD ratio nei sang ber chu NESF Bank niin, CD ratio 73652.58% an nei a, CD ratio nei tlem ber Yes Bank-in CD ratio 5.97% chiah an nei thung.

Public sector bank zingah PNB-in CD ratio 191.61% a neih laiin, a hniam ber UCO Bank chuan 21.68% chiah an nei. Priority sector advances bikah Annual Credit Plan target achievement chu 9% chauh a ni a; priority sector loan la pe chhuak lo (zero achievement) bank panga - Central Bank of India, IOB, Axis Bank, ICICI Bank leh Yes Bank-te an awm.

Priority sector advances (loan) chu cheng vbc. 2,579.18 a ni a, chu chu advance total aṭangin 61.50% a ni. RBI-in priority sector lending atana a bituk 40% aiin 21.50%-in a tam zawk. Agriculture advance (loan) total chu vbc. 617.70 niin, total advances aṭangin 14.73% a ni a, RBI-in Agriculture sector lending atana a bituk 18% chu 3.27%-in a pha lo.

Chief secretary Lalnunmawia Chuaungo chuan, Annual Credit Plan tihhlawhtlin dan a hniam avangin bank thuneitute chu ṭan la lehzual turin a chah a; tun hnuah chuan SLBC ang meeting pawimawhah chuan operation head-te ngei tel tawh turin a hrilh.

Lalnunmawia Chuaungo chuan, thingtlang khua, mi 2,000 aia tlem chênna khuaah banking service pek vek a nih theih nan bank hrang hrangte chu an chan khua (sub-service area) ṭheuh tana hma an lak dan tur October 2019 chhung ngeia hriattir turin a hrilh a; self help group-te tan loan agreement form stamp duty ngaihhnathiamna leh agriculture leh MSME loan late tan Rs. 5,00,000 chin hnuai lam tan stamp duty ngaihhnathiamna tura rawtna lut chu a bawhzui dawn thu a sawi.

SBI CGM Sunil Kumar Tandon pawhin, social security scheme hrang hrang - PMJJBY, PMSBY leh APY zawm tura customer-te zirtir uar leh zual turin bank hotute a chah bawk.

Mizoram bank report April-June 2019

1.Mizoramah bank chi hrang 29 a awm (public sector 14, private sector 11, RRB 1, Coop. bank 2)

2.Bank 29-te'n branch 220 an nei.

3.Bank-te'n ATM booth 176 an nei.

4.Bank-te sum hmuh zat vbc. 10,076.85

5.Bank-te loan pek chhuah (advances) zat vbc. 4,580.50

6.Mizoram puma bank-te CD ratio 45.46%

7.CD ratio sanna ber Siaha district 89.55%

8.CD ratio hniamna ber Aizawl district 36.60%

9.Bank zinga CD ratio sang ber NESF Bank 73652.58%

10.Bank CD ratio tlem ber Yes Bank 5.97%

11.Priority sector loan la pe lo bank-te - CBI, IOB, Axis Bank, ICICI Bank leh Yes Bank.

12.Agriculture advance (loan) total cheng vbc. 617.70

13.MSME loan pek tawh zat cheng vbc. 696.55.

14.PMMY (MUDRA) loan pek tawh zat vbc. 19.04

15.Stand Up India scheme pek tawh zat vbc. 14.34.

16.Housing for All-a loan pek tawh zat vbc. 123.17.

17.PMEGP scheme-a loan pek tawh zat vbc. 3.47.

18.NRLM hnuaia self help group 16 hnena loan pek zat nuai 23.

19.NULM-a Self Employment Program scheme-a loan pek nuai 101.

20.Housing loan mi 1,251 hnenah cheng vbc. 111.98 pek a ni.

21.Education loan mi pakhat hnenah cheng nuai 1 pek a ni.





Share this Post

Login to comment
No Comments