Shillong-a tui thianghlim tawk lo supply chungchang chhui dawn

Meghalaya sorkar hnuaia Public Health Department chuan state khawpui, Shillong-ah tui thianghlim tawk lo supply a awm nia sawi chu an chhui zui dawn tih a sawi.

Khawpui chhunga veng eng emaw zata tui supply chu in tur atana thianghlim tawk lo nia report a awm a ni. Hei vang hian PHE Department chuan hemi chungchang hi chhui chian a, a ṭul anga hma lak a tum tih a sawi a ni.

Federation of Khasi Jaintia and Garo People (FKJGP) chuan August 22 khan Shillong khawpuia veng 46 aṭangin tui supply sample hi a la khawm a, State Food Testing Laboratory, Commissionerate of Food Safety, Shillong-ah an test a ni. Sample 46 an test aṭang hian sample 44 te chu thianghlim tawk lo, in tana him lo niin an sawi.

Shillong khawpui tana tui pek, Greater Shillong Water Supply Scheme hi Mawphang-a Umiew lui aṭanga lak a ni. Tui sample hi a khat tawkin enfiah a ni ṭhin a, Drinking Water Standards-in a him chin a tihah a awm ṭhin niin official-te chuan an sawi. Mahse tun ṭuma sample an enfiaha tui a balh chhan hi fur ruah tui tlain lui a tihnut zual lai leh, Shillong-Tamabil inkara National Highway zauh hna thawk mek leh, Gravity Main pipeline thlak mekah pipeline leak a awm palh vangte pawh a ni thei niin an sawi.