Sorkar kalphung thar nei turin theihtawp kan chhuah mek - ZPM

Zoram Peoples' Movement (ZPM) party chuan 'Kalphung thar campaign beihpui' an thlak ṭan a, nimin khan Serchhip leh Kolasib-ah thuthar thehdarhtute an kâwm. ZPM hruaitute chuan, Mizo mipuite'n an duh ang sorkar kalphung thar an neih theihna atan theihtawp an chhuah mek thu an sawi.

Serchhipa Jemela restaurant-a thuthar thehdarhtute an kawm­naah ZPM vice president Lalthan­­sanga chuan, kalphung thar beihpui thlâkin khaw tin fan chhuah an tum thu a sawi a, "ZPM hi sorkarna siam turin mipuite'n an duh avangin kan MLA-te chungah pawh harsatna siamsak an ni. Rulling party-in pressure na tak an siam avangin Speaker chuan ZPM hming an put chhunzawm theih dawn loh thu a hrilh. Hemi chungchangah hian Court-ahte pawh kal a la ngai mai thei," a ti.

ZPM Vice President chuan, sorkarna chang tawhte'n hnam damna tura hna an thawh loh avangin Mizote chu hnam dang lakah an huaisen thei tawh lo tih sawiin, "Kan ṭhenawm state-te'n kan ram chhunga hma an rawn lak pawhin engtinmah kan ti lêt ngam tawh lo. Mizo nationalism kengtu nia insawia kan hnam aiawh inti, sorkarna siam mektute'n Mizoramah foreigner an awm an hre lote hi a mak hle," a ti a, MNF sorkarin hnam lungphûm an tinghîng tih a sawi.

Nationalism chu ZPM-in an kengkawh tlat dawn thu sawiin Lalthansanga chuan, "Ei leh bara intodelh a, kan hnam hi hnam huaisen leh zahawma siam leh turin kalphung thar kan kalpui dawn. Pu Brig. T Sailo policy kha ZPM aṭanga tihhlawhtlin theih a ni dawn. Tuna MPC-a la awmte pawh ZPM-a fatu hna thawk tura lût turin kan sáwm a ni. Party pawh political party danga president-te leh chief minister-te'n thuneihna tàwp an nei nghal ang ni loin kalpui a ni dawn," a ti.

Kolasib Press Club-a thuthar thehdarhtute an kawmnaah ZPM secretary general K Sapdanga chuan, ZPM-in sorkarna an siam chuan roreltu sorkar chauh ni loin, rawngbawltu sorkar an din dawn tih sawiin, "VC leh LC te, municipal administration te, autonomous district council-te leh state sorkarte hi thuneihna hmanga sum siamna remchang atan hmang ve loin, mipui rawngbàwlsakna atan kan hmang dawn," a ti a; mipui kawng kawhhmuhtu leh hma hruaitu chu sorkar a ni tih a taka an lantir dawn thu a sawi.

K Sapdanga chuan, ZPM chuan a din aṭanga thla 15-naah Assembly inthlanpui an hmachhawn tih sawiin, "Inbuat­saihna hun ṭha kan nei hman lo chungin Mizoram mipuite'n 'Kalphung thar, mipui sorkar' hmel hmuh an duh êm avangin bial pariat laiah hnehna kan chang. Kan chunga rinna nghattu mipui chungah lawmthu kan sawi nawn a ni. Thingtlang lamah duh angin mipui sorkar kalphung thar puanzar hman a ni lo a, thingtlang mipui chungah thupha kan chawi a, chuti chungin bial 10 laiah vote hmu tam pahnihnaah min hlángkai tho a ni," a ti.

ZPM Secretary General chuan, ZPM-in sorkarna an siam chuan mipui tan sakhaw zalenna humhim a nih tur thu sawiin, "Zalen taka kan zui kan sakhua a chêp ta. Kristian sakhua kan zui chhan ber Chanchin Ṭha hril hna thawh min khapsaktu chu sorkar laipui a ni. Kan sakhua nêkchêptu BJP-te thurualpui tlattute'n kan ramah ro an rel mek a ni," a ti a; ZPM chuan vote leina atana sum duh luat vanga Kristian nêkchêptutte thawhpui an tum loh thu a sawi.



Share this Post

Login to comment
No Comments