Mizo Zirlai Pawl (MZP), Tuipui-D branch chuan Tuipui-D Middle School-ah headmaster an awm loh avang leh mathematics zirtirtu an neih loh avangin zirlaite'n harsatna an tawh mek thu an sawi a; zirtirtu dah tura sorkar an phût thu an puang.

Tuipui-D MZP hian nimin khan Hnahthial Venglai YMA Hall-ah thuthar lakhawmtute an kâwm a; an president K Siloam Lalrinpuia chuan, Tuipui-D M/S-ah zirlai 68 leh headmaster Lal­ramzauva telin zirtirtu paruk an awm thu a sawi a, "Headmaster Pu Lalramzauva hi August 30, 2019 khan Sairang Mo­dern M/S-ah dah a ni a, a aiawh tur tun thlenga pek kan ni lo hi hriatthiam har kan ti a, attachment order cancel thuai turin Education department kan ngen a ni," a ti.

Mizoram sorkarin tun hnaia muster roll-a thawk tur zirtirtu 800 chuang a lakah Tuipui-D aṭanga diltute lak an ni ve lo chu hriatthiam harsa an tih thu sawiin Lalrinpuia chuan, "Sorkarin MR skilled-II primary teacher an lakah khan Mizoram pumpuiah a khua mite lak an nih deuh zel laiin, kan khuaa interview awm ve pahnih­te lak an ni lo a, khaw dang aṭanga rawn thawk tur lak an ni hi hriatthiam har kan ti hle a ni," a ti a; zirnaa hma an sawn tak tak theihna turin an khaw mi leh sa ngei zirtirtu an mamawh thu a sawi.

MZP sub-headquarters, Hnahthial president Emmanuel LT Chinzah chuan, Tuipui-D M/S headmaster sawn chung­changah School Education Minister an biak tawh thu sawiin "Headmaster hi pension hnai a nih bakah, accident vanga harsatna nei niin Minister-in a sawi a, mahse, kum nga vel zet service a la nei a ni," a ti.

Share this Post