Sorkar sikul tharte ṭha taka kalpui theih kan inring - CM

Mizoram Government Adhoc Aided School Teachers Union chuan an member sikul 180-te tun hnaia Council of Ministers-in sorkar sikula a dah lawmna nimin khan Chanmari YMA Hall-ah an buatsaih a, khuallian chief minister Zoramthanga chuan, "Sorkarna kan chelh leh a nih chuan ṭha taka kan kalpui theih kan inring," a ti.

Chief Minister chuan, sikul 180 sorkara lak chuan sum leh pai tam tak a mamawh tel avangin mi ṭhenkhatin a taka kalpui theih an ring lo mai thei tih sawiin, "Kan zawh tâwk tur ngaihtuah chungin he hmalakna hi kan tihlawhtling thei a ni," a ti a; zirtirtute chu an thawhna hmun ṭheuhah theihtawp chhuah turin a chah.

Zoramthanga chuan, sum leh pai harsatna karah sorkarin sikul leh zirtirtu tan theihtawp a chhuah reng nia sawiin, "Kan hre reng che u a, hripui leh harsatna dangte'n min tlâkbuak avangin beisei anga chakin kan ngaihtuah thei lo mai zawk a ni. Sorkarin sum hnár ṭha zawk a neih theih nan Resource Mobilization department kan siam thar a, ṭangkai takin kan hmang dawn," a ti.

Inkhawmah hian School Education minister Lalchhandama Ralte leh director Lalsangliana pawhin thu an sawi a ni.