MNF hnuaiah ruihhlo a pung nasa; a thu chauhin zu khap a ni - CLP Leader

Congress Legislature Party (CLP) leader Zodin­tluanga Ralte chuan, MNF rorelna hnuaiah ruihhlo a pun nasat thu a sawi a, "Zu pawh a thu chauhin an khap," a ti.

Zodintluanga Ralte hian nimin khan Aizawl Press Club-ah thuthar thehdarhtute a kâwm a; MNF sorkar hnuaiah Mizoramah ruihhlo hman sual a nasat thu sawiin, "Mizoramah drugs a hluar hle a, hetichung hian he harsatna chinfel a nih theih nan MNF sorkar chuan fund a dah tam lo," a ti a, ruahmanna ṭha nei loah MNF sorkar a puh.

Kum 2018 inthlan dawnah MNF-in drug rehabilitation lamah hmalakna an kalpui tur thu an puang tih sawiin Zodintluanga chuan, "Tunah an hun a tàwp ṭêp tawh a, drugs lama harsatna chingfel turin hmalakna lian tham an nei hauh lo. MNF rorelna hnuaiah drugs supply tihtawp aiin a pung zawk. Nunna chán pawh an tam tial tial a ni," a ti.

Zawhna chhángin Zodin­tluanga chuan, MNF sorkarin a thu chauhin zu an khap a, zu tihrêm tumin hma an la tak tak lo tih a sawi.

CLP Leader chuan, kuhva tawlh­ruk pawh tihtawp tum loah MNF sorkar a puh a, "Tih tak zeta hma an lak duh loh avangin kuhva smuggling a la kal reng. Sorkarin hma a lak ṭhat duh loh vanga kuhva chíngtute’n an ei leh bar zawnna humhim tura anmahni kutkawiha hma an lak a ngai ṭhin hi a lung­chhiatthlak tak zet a ni," a ti.

CLP Leader tarlan danin, damdawi hman khawloh avangin kum 2019-ah Mizo ṭhalai 55 an thi a, kum 2020-ah mi 67, kum 2021-ah mi 47, kum 2022-ah mi 43 leh kuminah September thla thlengin mi 47 an thi tawh a ni.

MNF-te'n ruihhlo tawlhrûk an thunun theih loh avangin tun hnai kum nga chhungin MNF sorkarah ṭhalai 259 an thih tawh thu sawiin Zodintluanga chuan, "Heng ṭhalaite thih chhanah hian tu nge mawhphur? State-a MNF sorkar leh centre-a BJP sorkarte hian ruihhlo tawlhrûk an thunun thei thlâwt lo a, a pung zual zel. Kum 2022 khan heroin kg. 152 lai man a ni a, kum 2023-ah thla kaw chhungin heroin kg. 150 man a ni leh dêr tawh," a ti.

Ruihhloin Mizoram ṭhalaite a tihchhiatnaah hlâwkna têl an awm theih thu sawiin CLP Leader chuan, "Tute nge drug sumdawnna hi kalpui, eng vangin nge MNF sorkar hian a hriat fiaha a man theih hauh loh?" a ti a; sorkar hotute remtihna hnuaia kal a nih leh nih loh a zawt.

Zodintluanga Ralte chuan, drug supply tam chhanah thil pahnih chiah a awm thei tih sawiin, "MNF sorkarin a thunun thei thlâwt lo tih leh, drug cartel-ah hian telin ṭhalaite tihchhiat pawisa loin sum siam nan an hmang em ni tih a ni. Congress party-in thuneihna kan chan chuan chhui chian vek a ni ang a, mawhphurtute hrem lohin an chhuak lo ang," a ti.