Tripura refugee camp-a Bru-te Mizorama hruai kîr hna thawh mekah dodalna a awm avangin Mamit DC Dr Lalrozama chuan nimin khan Naisingpara camp-ah Bru pawl hruaitute a kâwm.

Dr Lalrozama chuan, Bru lâk lêt hna thawh mek chu tluang taka a kal zel theih nan Mizoram khua leh tui dik tak, Mizorama lêt duhte chu dang lo a, kaltir tur leh harsatna siam lo turin camp hrang hranga awmte a ngen a ni. 

Mamit DC chuan, Tripura refugee camp-a Bru-te Mizorama haw tawhte leh let tumte chu thinlung takin Mizo mipuite'n an lo lawm thu a sawi a ni. 

Tun hnaia Tlangkhang, Mamit district-a nupa intihthiam lohna vanga tualthihna thleng chu chî leh chî emaw, hnam thil emaw vang a ni lo tih sawiin Mamit Bawrhsap chuan, "Bru lâk lêt hna thawh mek nen inkaihhnawihna nei lo a nih avangin, hruai kir hna kal mek tihṭhuanawp nana hman chi a ni lo," a ti.

Bawrhsap ṭawiawmtu Mamit SP chuan, hruai kîr hna thawh mekah harsatna awm lo turin venhimna kalpui a nih thu a sawi a, "Tlangkhang buainaah thil tisualtu nia rinhlelh chu man a ni tawh," a ti.

Bru pawl hrang hrang hruaitute chuan, an thil phût tihhlawhtlin phawt a nih loh chuan Mizorama lêt an duh loh thu an sawi thung.

Sorkar thuchhuah tarlan danin, Mizoram khua leh tui Bru, Mamit district chhunga hruai lêt tawhte chu harsatna nei loin an awm lailâwk­na tur (temporary shelter)-ah an khawsa mek a, chhawmdawlna pawh pek an ni tawh.

Mamit DC-in Bru camp a tlawhnaah hian Mizoram sorkara official-te bakah, North Tripura district aṭangin district magistrate leh Kanchanpur SP-te pawh an tel a ni.

Share this Post