Keifang leh Champhai inkara lirthei lian intlân chhâwk dan tur

Aizawl district superintendent of police C Lalzahngoa chuan Keifang leh Champhai inkar kawngpuia lirthei lian intlan chhâwk dan turah hriattirna a tichhuak. Hriattirna hi mipui himna atan leh harsatna sutkianna atana tih a ni a, October 15-31, 2019 chhung atana tih niin, lirthei lian intlân chhâwk mek chhunzawmna a ni.

Lirthei lian chite intlan chhâwk dan tur chu - tahrik ni inkawp kim lo (odd day)-te chu Keifang aṭanga Champhai pan turte tlân hun tur niin, zan dar 12 aṭanga a tûk zan dar 12 thleng an tlan thei dawn a ni. Tahrik ni inkawp kim (even day)-ah zan dar 12 aṭanga a tûk zan dar 12 inkar chhungin Champhai aṭanga Keifang lam pan turte tlân tur a ni ang.

Intlân chhâwk laiin kawng laka harsatna a awm loh nan, Aizawl/Keifang lam aṭanga motor chhuak turte reng reng chuan Champhai lam aṭanga motor tlânte nang buai lo turin mahni tlan hun dik taka tlan chhuah hman tur a ni a, rokhawlhna bik vanga hun bituk chhunga Khankâwn paltlang hman lote chu kawngpui sir remchang laiah an tlân leh theih hun nghah tur a ni.

Thupek hian rîkrum thila lirthei tlan te, dan leh thupek kenkawh kawnga duty-te leh mihring phur bus-te a huam lo.

Thupek chungchanga harsatna tâwk emaw, report duh neite chuan Saitual Police Station (PS) phone 8257006442, Saitual PS OC phone 9856090789, Champhai PS phone 8974924728, Khankawn police checkgate phone 8730817932 leh Khawzawl PS OC phone 8575564420-ahte hriattir theih a ni.



Share this Post

Login to comment
No Comments