RTI Week hman ṭan a ni

Nimin khan Assembly Annexe conference hall-ah Right to Information Act Week hman a ni a, Governor Dr Hari Babu Kambhampati-a'n a hawng. RTI Week hi kum tin October 5-12 chhungin hman a ni ṭhin.

RTI Week hmannaah hian chief information commissioner thar John Neihlaia leh information commissioner thar Mangjangam Touthang te, department/office hrang hranga SPIO leh assistant SPIO te, RTI Act hmang ṭangkaitu hrang hrangte an tel.

Governor chuan, RTI Act chu sorkar khalh ngilna leh sorkar ṭha siamna hmanrua a nih thu sawiin, ṭangkai lehzuala hmang turin mipui a chah a, RTI Online a awm tawh avangin RTI Act hman a awlsam lehzual tawh thu a sawi. Chutih rualin, RTI Act chu hman sual theih a nih avangin fimkhur a ṭul thu a sawi bawk.

Chief information commissioner John Neihlaia pawhin thu sawiin, RTI Act chu eirukna leh hlemhletna dona hmanraw ṭangkai tak a nih thu a sawi. Inkhawmah hian RTI Act hmang ṭangkaitute zinga mi F Lalliansanga leh Vanlalruata te pawhin RTI Act chungchanga an tawnhriatte an sawi a; college zirlaite puala RTI Slogan Writing Competition-a ti ṭhate hnenah lawmman sem a ni.

Kum 2005-ah RTI Act hman ṭan a ni a, kum 2006-ah Mizoram Information Commission din a ni. MIC hian a din aṭanga tun thlengin second appeal 134 leh complaint 157 an dawng tawh a; Annual Reports 17 a tichhuak tawh bawk.