Tlânna tlâka kawng siam loh chuan Vairengte-Sairangah lirthei tlàn dawn lo
Lirthei neitu leh khalhtu páwl hrang hrangin an din, Joint Action Committee (JAC) chuan nimin khan Aizawl Press Club-ah thuthar thehdarhtute an kàwm a; Vairengte-Sairang inkar kawngpui chu tlânna tlâka thawm ṭhat a nih hma chuan October 9, 2023 zing dar 7 aṭangin an lirtheite tlàntir rih loh an tum thu an puang.
Mizoram Truck Owners' Association president B Lalzarzova chuan, kawngpui ṭhatna tura hmalak dan ngaihtuah turin lirthei neitu leh khalhtu pawl hrang hrangte'n JAC an din thu a sawi a, "Sorkar dodal ngawr ngawr leh mipui harsatna siam tum kan ni lo. Kan harsatna tawh hi hre lo tam tak an awm ngei ang a, Mizo mipui hian hre ve se kan duh a ni," a ti.
B Lalzarzova chuan, Vairengte leh Sairang inkar kawngpui a chhe hle tih sawiin, "Manipur lamin kan ram aṭanga châk lâk luhna atana an hman, Manipur panna kawng Kawlkulh leh Hliappui inkar a chhe hle. Champhai tlangdung lamah pawh Kawlkulh-Tuichâng a chhe hle bawk," a ti a; kawngpui chhiat vangin lirthei neitu leh khalhtute'n harsatna an tawh nasat thu a sawi.
Chak zawka kawng siam a nih theih nan October 9, 2023 aṭangin tlân rih loh an rêl thu sawiin Lalzarzova chuan, "Lungawi lohna lantir lam leh mipui tana harsatna siam tum lam ni loin, chak zawka kawng siam a nih theih kan beisei vang a ni. Kawngpuite hi siam ni ve bawk mah se, ruah a sûr reng a, ni tin truck 100 chuangin kan rah bawk avangin an siam chak thei lo a ni thei. Tlân lo ila an siam chak theih kan beisei," a ti.
Lirthei neitu leh khalhtute chuan, kawng chhe lai a tam loh thu sawiin, "A chhe lai erawh a chhe hle. A chhe zual lai hi rei lo têa siamṭhat theih a nih kan ring. October 9 hmaa tlànna tlaka siam a nih loh chuan Vairengte-Sairang inkarah kan tlân rih dawn lo," an ti a; lirtheite dintir ngai loa tlânna tlâkin siam hman a nih ngei an beisei thu an sawi.
Kawngpui chhia vangin lirtheiin a tawrh nasa thu sawiin JAC hruaitute chuan, "Truck a tlûk kher loh pawhin vawi khat bungrua kan phurh hian kan lirtheite siam a ngai zel. Loan hmangtea to tak taka kan lei kan lirtheite hi a chhe rup ang tih kan hlau. Chuvangin, kan tan chuan din rih mai a ngai. Loan rûl zo tawh eng emaw zat chuan an lirtheite an tlàntir tawh lo," an ti.
Lirthei neitu leh khalhtute chuan, Mizorama kawng tam zawk chu Ministry of Road Transport & Highways kawng a nih thu sawiin, "Kan ram chhung a ni a, Mizoram sorkar pawhin central lam pawh an nawr ve turah kan ngai," an ti a; kawng chhiat chungchangah Chief Minister leh PWD hotute pawh an hmuh tawh ṭhin thu an sawi.
JAC-ah hian Mizoram Truck Owners' Asso-ciation, Mizoram Truck Drivers' Association, Mizoram Tipper Owners' Association & Drivers Association, Mizoram Oil Tanker Drivers Association leh Kolasib District Drivers Welfare Joint Action Committee an tel a; Kolasib-Aizawl maxicab-te pawh an huam vek bawk.