Cricket World Cup: Babar Azam leh a hote inlan dawn

Vawiin chawhnu dar 2:00 hian Rajiv Gandhi International Stadium, Hyderabad-ah Pakistan leh Netherlands ten Cricket World Cup match an khel dawn. Shaheens hi chak tur chianga ngaih an ni a, Test khel pha lo Netherlands tan 'upset' thlentir a harsa dawn.

Pakistan captain Babar Azam hian World Cup hnuhnung berah khan 474 runs a siam a, Shaheens batter zinga WC inelna vawi khata runs siam tam ber a ni.

World Cup atana inpuahchahnaah Pakistan hian New Zealand leh Australia an hneh lo a, mahse inkhel pahnihah hian 330 runs an siam tling ve ve. Babar Azam hian 80 leh 90 runs a siam a, Netherlands lakah century a vuak tlin theih mai a rinawm.

Netherlands hian qualifier paltlangin World Cup an khel a, warm up match-ah Australia leh India khelhpui tur ni mah se ruahsur vangin an khel thei lo. Hyderabad-ah cricket-a Netherlands dinhmun a hriat theih ang.