YMA conference atan inbuatsaih mek

YMA General Conference vawi 72-na chu October 15-17, 2019 chhungin North Vanlaiphai khuaah neih a ni dawn a, a thlengtu tur N. Vanlaiphai khua leh Central YMA-te chu ngawrh takin an inbuatsaih mek a, naktukah hian pandal hlanna inkhawm neih a ni dawn.

Organising Committee secretary Vanlalzawnga'n Vanglaini palai zawhna chhanga a sawi danin, YMA General Conference neihna tur hian Ràwlkhang Field-ah pandal sak a ni a, a hmingah 'Chhura Rún' tih a ni.

Vanlalzawnga chuan, pandal chu August thla lai­hâwl velah sak ṭan a ni tih sawiin, "Kan zo hnai dawn tawh a, tun Ningani (October 10) hian pandal hlanna inkhawm neih kan tum. Pandal hlan hnuah pawh khawih belh leh chei ngai laite chu khawih chhunzawm zel a ni ang," a ti a; pandal chhungah mipui 4,000 vel ṭhu leng tura ngaih a nih thu leh stage bikah mi 150 vel an ṭhut theih dawn thu a sawi.

Organising Committee hnuaia Information depart­ment secretary Lalchhuan­mawia chuan zawhna chhangin, YMA General Con­ference an thlenna turah hian sorkar department 

ṭhenkhat aṭangin puihna leh inhlawhnate an hmuh thu a sawi a; "Khaw mipuite nasa takin kan inbuatsaih a, chhungkaw tam tak chuan mikhual riahna tur bûkte an sa a ni. Mikhual 7,000 vel kan beisei a, YMA conference-ah hian a tam thei ang ber kal turin kan sáwm a ni," a ti.



Share this Post

Login to comment
No Comments