Mizoram state lottery chu kalphung thara kalpui tum a nih vanga hun eng emaw chen kalpui theih a nih loh hnuah, tun hnai khan a hmaa kalpui ṭhin dan ang thoa kalpui leh a ni.

Finance department hotute hnen aṭanga Vanglaini thu dawn danin, Mizoram sorkar chuan lottery chu kalphung thara kalpui a tum avangin August 2019 aṭangin a titawp lailâwk a; kalphung thar anga kalpui theih a nih chuan, a hma aiin Mizoram sorkarin sum a hmuh tur a tam zawk dawn a ni.

Kalphung thara kalpui turin tender chhuah a ni a, mahse, distributor lam Court-ah an zualko avangin kalpui theih a ni rih lo. Chuvang chuan, sum hmuh loh tawp ai chuan a hmaa kalpui ṭhin dan angin kalpui leh mek a ni a, kalphung thar anga kalpui theih a nih veleh kalphung hmasa hi tihtawp tum a ni.

Finance department hotute chuan, lottery distributor zingah Gauhati High Court-a zualko an awm avangin lottery chu kalpui theih a ni rih lo tih an lo sawi tawh a, "Distributor-te kha July 2019 thla tàwp thleng an hun pawhseisak an ni a, hun tiam a zawh hnu, August 1 aṭang chuan kalpui a ni tawh rih lo. Lottery hi kalpui a nih leh theihna atan hmalak mek zel a ni," an ti.

Sorkar tharah kalphung thara lottery kalpui tum a nih thu sawiin Finance hotute chuan, "Kalphung thar hmang turin ruahmannate kan siam vek tawh," an ti a; kalphung thar ruahman anga lottery chu kalpui theih a nih chuan, a hma aiin Mizoram sorkarin a hlâwkpui zawk tur thu an sawi.

Finance department hotute sawi danin, paper lottery atan tender chhuah a ni a, distributor tur pawh thlan a ni tawh. Mahse, Court-ah zualko an awm avangin distributor tur atana thlante chuan lottery an kalpui thei rih lo.

Online lottery atan erawh chuan tender chhuah a la ni lo. Online atan pawh hian tender chhuah tum a ni a, mahse, Ministry of Home Affairs (MHA) lamin a kalpui dan lamah thil fel tâwk lo awma an hriat avangin tender chhuah a ni lo.

Online tender hi Goods & Services Tax (GST) hman a nih hnuah chhiah chawi ngai a tam tawh avangin distributor-te'n an bawh vak lo. GST avanga lottery-a harsatna awm chu GST Council Meeting-ah pawh sawi chhuah ṭhin a ni a, mahse, chinfel theih a la ni rih lo.

Lottery tihtàwp lailâwk a nih hma chuan Mizoram State Lottery hnuaiah distributor pali an awm. Paper lottery chu Teesta Distributors-in an buaipui a; online lottery pathum chu Summit Online Trade Solution, NV International leh Ecool Gaming Solution ten an kalpui thung. Heng distributor hluite hian kalphung thara kalpui theih a nih loh avangin lotery chu a hma angin an kalpui leh mek a ni.

Share this Post