Nungchate tihhlum ṭhin pawi ti

Conservation Mizo­ram chuan thu­chhuah siamin, Mizoramah nungcha leh ramhmulte nawmchenna atana tihlum leh nghaisa ṭhin an la awm niin an tarlang a, "Pawi kan tiin kan dem tak zet a ni," an ti.

Mizoram chu nungcha chi hrang hrang leh ramhmul hlu tak tak awm tamna hmun a nih thu tarlangin Conservation Mizoram chuan, "Khawvel huap pawha hmun hlu tak a ni tih hre nawn leh ṭheuh chungin, dimdawi taka enkawl turin mi tin kan ngen. Khawvela thil siam tinréngte hi inpéng tawn leh inmamawh tawn vek kan ni tih hre thar ang u," an ti a, thil siam dangte laka zahngaihna lantir turin mipui an ngen.

Social media-ah nungcha chunga hleilenna leh râwng taka kutthlakna thlalak leh video hmuh tur a awm fo tih tarlangin Conservation Mizoram chuan, "A ṭha lo kan ti tak zet. Nungchate chunga nunràwnna chi hrang hrang leh nungchate tihhlum ṭhinte hi sim turin kan ngen a ni. Hetiang ti lai thlalak leh video thehdarh ṭhinte hian mi tam tak rilru a hruai sual theih avangin fimkhur lehzual turin kan ngen a ni," an ti.

Conservation Mizo­ram chuan, nungcha chunga hleilenna leh tihhlum chu dan hrang hrang bawhchhiatna a nih thu leh thiam loh chantirte chu hrem theih an nih thu an tarlang a; thuneitute leh dan kengkawhtute chu nungcha chunga hleilennate tun aia chak zawk leh khauh zawka en zui tur leh hrem ngaite dan hmanga hrem zel turin an ngen bawk.