National Integration Tour zo fel

Mizoram Journalists' Association (MJA) member-te tana 2nd Assam Rifles-in National Integration Tour an buatsaiha kalte chu nimin khan Mizoramah an rawn haw a; an zin chhungin state pathuma hmun hrang hrang an tlawh.

AR National Integration Tour- a kalte hi Arunachal Pradesh-a China ramri, Bumla Pass thleng an kal bakah, Tawang, Jang, Dirang leh Bomdila-a hmun pawimawhte an tlawh. Bhutan ramri an tlawh bakah, Laitkor, Shillong-a Assam Rifles hmunpui ber - Director General hmunhmate leh Shillong-a hmun pawimawhte an tlawh bawk.

Tawang khawpui dáia India sipai 40 Infantry Brigade an tlawhnaah commander Brig. Devrat Shekhawat leh officer dangte nen an inkâwm a; DGAR an tlawhnaah Brig. Rohit Sehgal leh officer dangte nen an inkâwm bawk.

Indian Institute of Management, Shillong an tlawh bawk a, IIM hotute'n an hmunhmate chipchiar taka an fanpui bakah, an dinhmun tlangpui an hrilhfiah a ni.

MJA hruaitute chuan, an ngenna anga Assam Rifles hotute'n NIT an buatsaihsak chu lawmawm an tih thu an sawi a; a bik takin a ṭul apianga hma latu - 23 Sector commander (DIG) Brig. Girish Upadhya leh PRO Lt. Col. Swati Negi, 2nd AR commander Col. Mukesh Suhata, adjutant (PRO) Maj. Aditya Somvanshi leh officer dangte chungah lawmthu an sawi a ni.