MSU-in kawng zawh tur an ṭhulh HM Zira leh MSU thu a inang lo

Persons with Disabilities (PwD) commissioner B Sairengpuii bân phûta Mizo Students Union (MSU) huaihawta vawiina Aizawla kawng zawh tum chu
ṭhulh a ni. Hetih lai hian, B Sairengpuii chungchangah MSU leh Home Minister Lalzirliana thusawi a inang lo.

MSU chuan thuchhuah siamin, Home minister R Lalzirliana'n February 15, 2016 hmaa B Sairengpuii bàn a nih tur thu a sawi avangin vawiina kawng zawh an tum chu an ṭhulh tih an tarlang.

Home minister R Lalzirliana chuan, B Sairengpuii bàn a nih leh nih loh turah intiamna a nei lo tih Vanglaini palai zawhna chhangin a sawi thung.

Home Minister chuan, MSU, Aizawl City College Joint Students' Union leh Mizoram Blind Society hruaitute nen an inkawmnaah, "Min ring tur leh min rin ngam chuan PWD Commissioner bàn a nih theihna atan theihtawp kan chhuah tur thu ka hrilh. Min rin ngam chuan a thawh chhunzawm zel lohna atan ṭan kan la dawn. Mahse, intiamna erawh ka nei lo," a ti.

MSU thuchhuah chuan, vawiina kawng zawh an tum chungchangah Home Minister chuan PwD commissioner B Sairengpuii'n February 15, 2016 hmain a hna a chelh tawh loh tur thu a sawi niin an tarlang a.

Home Minister hian, "Sorkarin zirlaite auhla hi a hria a, B Sairengpuii chhawr nawn lehna chungchanga in duh lohna hi a hmu chiang hle a, a ruaitu hi sorkar kan nih angin sorkar mawhphuhrna a ni a, February 15 ral hmain he hna aṭang hian sorkar chuan a chawlhtir dawn a ni," tiin a lo chháng niin MSU hian an sawi.

Home Minister thusawi an ngaihtuah nghal tur thu sawiin, MSU chuan, "Home Minister-in zirlaite leh ram mipuite hmaa thu a tiam hi rin tlakah kan ngaih avangin kawngzawh kan tum pawh ṭhulh ni se kan ti a. He intiamna hi sorkarin a tihhlawhtlin leh hlawhtlin loh chu MSU leh a thawhpui pawl dangte'n kan ngaichâng dawn a ni," an ti.

MSU chuan, Mizoram sorkar chu PwD Commissioner ṭha, rualbanlote hmangaihtu leh rualbanlote enkawl kawnga tawnhriat nei ṭha ruat thuai turin a ngen nghal a ni.