AAP-in hur sual zawnga social media hmangtute dan anga hrem an ngen

Aam Aadmi Party (AAP) zirlai pawl Chhatra Yuva Sangharsh Samiti (CYSS) hruaitute chuan nimin khan Aizawl Press Club-ah thuthar thehdarhtute an kawm a; Mizo ṭhalaite zingah a hur sual zawnga social media hmang an tam thu leh dan anga hrem ni ṭhin se an duh thu an sawi.

CYSS-AAP, Mizoram president Vanlalthlamuanpuia chuan, tunhnaiah Mizo ṭhalaiten social media, internet leh mobile phone, etc. an hman danah hur sualna rawngkai (pornography/sex live) a hmang an tam tih a sawi a, "Heng hur sualna rawngkai nasa taka hluar mek hi dan ang taka hremna lekkawh ngaiin kan hria. IT Act 2000 (section 67) dan hnuai bakah, IPC leh Indecent Representation of Women (prohibition) Act hnuaiah dan ang takin hremna pek theih an ni," a ti a; hmala theitu leh thuneitute chu hma la turin an ngen tih an sawi a; sorkar bakah, NGO leh kohhran-te pawh social media hman dan inzirtir kawngah tun aia nasaa ṭan la turin an ngen a ni.