MNF-in Martarte Ni an hmang

MNF chuan nimin khan Mizoram hmun hrang hrangah Martarte Ni an hmang a, Aizawlah chuan Hnam Runah MNF president Zoramthanga, chief minister hoa hman a ni.

Zoramthanga chuan Israel-te pawh nationalism banga inhung tur an nih laiin an inhung phui zo lo, kum 2000 an vahvaih hnuah Juda leh Benjamin hnam tlem (Isarel)-te an dingchhuak tih sawiin, "Kum 1948 khan an nationalism-in a dinchhuahtir chauh a ni. Pathianin keini hnam tlem te pawh ram min pe a, khawchhak aṭanga lo tla thlain ram, hnam leh lal thuthlung nen kan nationalism chu kum 1966-ah a lo tho ta a ni," a ti.

Kum 20 chhung hnam thinlung thisena baptis-in tih sawiin MNF President chuan, "A tawpah kum 1986-ah inremna kan lo nei ta a ni. He hnam thinlung (nationalism) hi a rei tulh tulh a, hnam tlem zawk tan chuan a hlu tulh tulh a ni. Dam chhuahna awm chhun a ni. Kan chhehvel en ila nationalism tel lo chuan hnam engzat nge buai tawh," a ti a, kan hnam martarte thisen hlutna hi a rei tulh tulh anga kan hre tulh tulh dawn niin a sawi.

MNF President chuan Mizoram chu martarte thisen baptist a nih thu sawiin, "Kan hnam hi a ral tep ṭhin, mahsela tling lo takin hnam thuthlung 'Pathian leh kan ram tan' tih kengtuten harasatna karah an vuan tlat zel a, a rawn tho chhuak leh ṭhin. MNF chu tuar tura din, harsatna su tura din a ni. Chutiang chuan ram an enkawl chuan a puitling ṭhin," a ti.

B34 Gulmohar Park-ah remna palai tura Laldenga leh Tawnluiate nen an kal thusawiin Zoramthanga chuan, "Morarji Desaia sorkarin phatsanin tan inah min tantir," a ti a, MNF hotuten India nen remna an siam tiin dawta an hek avangin ramhnuai headquarter lam chuan Laldenga chu president leh primary member a nihna an paihsak hial thu a sawi.

Zoramthanga sawi danin, India sorkar chuan Laldenga chu foreign-a ambassador ni turin an thlem a, amah IAS confer tur leh Tawnluiah pawh sipaiah an thlem. Amaherawhchu an dinna an sawn chhin lo, tlanchhuah dan chiah an ngaihtuah.

MNF President chuan MNF chu a san lai leh chhiat em em lai a awm tih sawiin, "Mah se, martarte thisenin a suk fai puan sintute kan ni a, mawina leh malsawmna kengtute kan ni. Kawng dang hawi thei kan ni lo. Harsatna leh lungngaihna karah ṭap chungin kan kal zel ang," a ti a, a tawpah Pathianin malsawmna a pek ngei tur thu a sawi.

Martarte Ni puala inkhawm hi MNF vice president Vanlalzawma'n kaihruaiin, martarte sunna hun hman a ni.