Zirtawpni zan khan Mizo Idol season 7 top 10 intihsiakna chu zawhfel a ni ta a, intihsiakna an chhunzawm leh hunah chuan mi panga chiah an intihsiak tawh dawn.

Top 10 intihsiakna zan hnihna aṭang khan live music nen an zai tawh a, Mizoram chhunga musician ṭha ber berte'n an vilin an pui tawh bawk a, contestant-te zai ngaihthlak a manhla sawt viau. Show zawh thlengin live music nen an zai tawh ang. Thawhlehni zanah Top 5 a hriat tawh dawn a ni.

Contestant-te an zai a ngaihnawmzual
C Vanlalroluahtumi chuan 'Chatuanin' hmangin Top 10 zan hnihna rawn hawngin a zai ṭha hle. Kari Jobe hla, Mizo ṭawnga lehlin a rawn sa a, a hla 'range' a zau a, chuti chung chuan a sa hnehsawh hle. A sak tur awm tak a sa tih a chiang.

Contestant zinga rock music champion pui tumtu Eddie Malsawmtluanga chuan ṭang ṭha atin 'Kei ka chhailaidi tawnah hian' tih hla chu a rawn sa ve thung a, rock vocalist ṭha a nihzia a rawn pholang nawn leh.

Jeffrey Lallawmsanga pawhin rock genre bawk rawn din chhuahpuiin fam ta Lalbiakmuana'n thiam taka a sak ṭhin 'Ka tawn thar di' a rawn sa ve leh thung a, a aw nen a inhmeh hle. Jeffrey zai zawhah hian PC Lalrinsanga chuan Tribal Power-in tunhmaa an lo larpui em em ṭhin hla mawi tak 'Lianchhiari' chu lungrun tak leh ngaihnawm takin a rawn sa ve bawk.

Aw lian ṭha, a hla sak apiang hnehsawh taka la sa zeltu J Lalchhanchuahi chuan 'Zurui ṭawngṭaina' hnehsawk takin a rawn sa a, a sa hnehsawh bawk nen, ngaihthlak manhla tak a ni.

Chhanchhuahi zai zawh hian kumin Mizo Idol-a huhang nei ngah ber zinga mi T Vanlalhmangaihi chuan 'Ka chul leh ṭhin' tih hla a rawn sa a, a hmaa zaite nena khaikhin chuan a style a dang hle. A 'originality' la vawng nung zelin ani pawh hian a style champion-pui a tum ngei niin a lang a, a hlawhtlinpui zel dawn em tih chu hriat a chakawm tawh hle.

David Lalchawisanga Darlong a rawn lang a, Robert Lalnghakliana'n a sak ṭhin 'I hlui thei lo' a rawn sa a, a sa mawi tak zet. David-a hi a zai thiam tak zet a, a awin ngaihno a bei bawk. Intihsiak ṭan tir aṭangin a la zai chhe ngai lo a, hla a thlang sual ngai lo ti ila kan sawi sualin a rinawm loh.

David-a zai zawh hnuah Suangpuilawn tlangval Vanlalngaihsaka rawn ding chhuakin 'retro' takin 'Eng dang reng ka ngai lawng' a rawn sa a, a hla sak tur a thlang sual lo tih a chiang.

Lalngaihzuali chuan Pathian fakna hla lar tak 'I hmangaih ropui chuan'chu style mawi tak maiin a rawn sa a, sang a tlin a, hla range zau tak kha hnehsawh takin a sa chhuak vek a, a theihna pholang tur zawng takin a hlasak a rawn her danglam a ni.

A tawp kharna atan contestant zinga mipui lawm hlawh ber zinga mi Deborah VL Hmangaihi chuan Zodi hla 'Chuailo parmawi' a sa a, a zai ngainatute lung a dum leh dawn tih a chiang nghal. Hmabak eng ber zinga mi a ni tih hai rual a ni lo.

Tla tur hriatthiam a har, mipui vote a la kal zel
An zai thiam tawh hlawm bawk a, judge-te comment uluk taka ngaihthlak pawhin tla tur emaw tling tur emaw hriatthiam har kan tihtlan a rinawm. Zai zawng zawng an fak rualin sawisel an ngaihna laiah an dim lutuk tawh hlawm lo. An zai thiam hlawm si a, top 5-a inhlangkai tur hriat a chakawm tawh viau.

Social media platform hrang hrang kaltlangin vote thlak theih reng a la ni a, Zonet Youtube Channel, Mizo Idol Instagram leh Mizo Idol Facebook Page-ahte contestant-te zai hi dah chhuakin Thawhlehni chhun dar 12 thleng vote a thlak theih dawn.

Nimin thlenga vote hmu sangzual
T Vanlalhmangaihi, David Lalchawisanga Darlong leh Deborah VL Hmangaihi-te chu nimin thlenga mipui vote hmu ṭha zual an ni.

T Vanlalhmangaihi leh Deborah VL Hmangaihi-te chuan YouTube lamah like 60k an nei tling ve ve tawh a, David Lalchawisanga chuan 50k a nei tling ve tawh bawk. Instagram lamah Deborah-i'n like a ngah fal deuh a, 70k chuang a nei a, David-a chuan 65k chuang neiin Vanlalhmangaihi chuan 51k chuang a nei ve tawh bawk.

Facebook-ah chuan Hunthar veng nula Hmangaihi hian 6.2k vel like a nei tawh a, Deborah-i'n 8.2k chuang nei tawh bawkin David-a chuan 11k chuang daih a nei tawh thung a ni.