Kartawp Box Office-ah kar hmasa lawka tlangzarh Fast & Furious Presents: Hobbs & Shaw chu a hit nghal hle a, tihchhuah a nih karah sum lalut hnem ber a ni nghal a, Box Office-ah ro a rel nghal.
Chart hmasa lama roreltu The Lion King (2019) chuan a lalna a humhim zo ta lo a, pahnihnaah a awm ve a ngai ta thung. Once Upon a Time in Hollywood chu sum lalut tam pathumna a la ni ve bawk.
Hobbs & Shaw an hrawl
August 2 khan US-ah tlangzarh a ni a, tlangzarh a nih phat aṭang hian a che ṭha nghal hle a, Global Box Office-a a sum hailuh zawng zawng chu $mtd. 180.8 a tling tawh.
Fast & Furious en ṭhinte chuan Hobbs leh Shaw-te hi tute nge an nih an hre vekin a rinawm. Tunlai hollywood movie hoah chuan Hobbs leh Shaw (Dwayne Johnson leh Jason Statham)-te aia action movie chang thiam hi an awm chuang awm lo e tih tur a ni a, chung mite pahnih thawhdunna film chu a hmuhnawm lo thei lo ve bawk a ni.
Hobbs & Shaw script hi Chris Morgan ziah a ni a, Dwayne Johnson leh Jason Statham-te hi a produce tu zingah an tel nghal bawk. Anni pahnih bakah hian Chris Morgan leh Hiram Garcia-te pawh produce tuah an tel. Deadpool 2 leh John Wick, hlawhtling taka lo direct tawhtu David Leitch-a direct a ni bawk a, a hit nghal viau pawh hi a awm hle a ni.
Kartawp US Box Office-ah khan $60,038,950 zet a lalut a, theatre 4,253-ah chhuah a ni bawk. He movie hi minute 135-a thui a ni a, an budget chu $mtd. 200 a ni a, budget hi chu an hmulet vat dawn niin a lang.
July 13 khan Hollywood-a Dolby Theatre-ah premiere a ni a, tlangzarh a nih tak erawh chu kar hmasa Zirtawpni kha a ni thung.
Top 5-ah film ṭha tak tak hlir
Kar hnih lai roreltu The Lion King (2019) chuan $ 38,520,022 lalutin pahnihna a hauh a, kar hmasa lama pahnihna Once Upon a Time in Hollywood chu pathumnaah a tla thla ve thung.
Marvel Cinematic Universe hit Spider-Man: Far from Home pawh sum lalut tam palina a la ni phak a, Toy Story 4 chu sum lalut tam pangana a ni bawk. Top 5-a lang zingah hian Once Upon a Time in Hollywood tih loh hi chu chart-a pakhatna dinhmun luah thei ṭhiau an ni hlawm a, a ṭhen hi chu a zawna sum lalut hnem ber ni theite an ni bawk. Hemi avang hian US Box Office kar tawp chart-a langphak ho hi an nep lo hle a ni.
Box Office Top 10
1 Fast & Furious Presents: Hobbs & Shaw $mtd. 60
2 The Lion King (2019) $mtd. 38
3 Once Upon a Time in Hollywood $mtd. 20
4 Spider-Man: Far from Home $mtd. 7.9
5 Toy Story 4 $mtd. 7.3
6 Yesterday $mtd. 2.46
7 The Farewell $mtd. 2.41
8 Crawl $mtd. 2.18
9 Aladdin (2019) $mtd. 2.12
10 Annabelle Comes Home $mtd. 0.8
